05.02.1981
Sameinað þing: 46. fundur, 103. löggjafarþing.
Sjá dálk 2171 í B-deild Alþingistíðinda. (2391)
186. mál, einangrun húsa
Alexander Stefánsson:
Herra forseti. Ég get tekið undir það, að vel fer á því að svo margar till. hafa komið hér fram um skyld efni sem eru þýðingarmikil. Verður því tækifæri að skoða öll þessi mál í heild í þeirri nefnd sem fær þetta mál til meðferðar.
Ég tel að í sambandi við þessa tilraun, sem Sturla Einarsson byggingarmeistari hefur gert, sannist enn á ný að það vantar visst samhengi í þessi mál hjá okkur. T.d. er mér kunnugt um það, að hann hefur lent í erfiðleikum að sanna sína tilraun, m.a. vegna þess að verkfræðingar og arkitektar, sem hanna eða teikna slík hús, hafa teiknað hús sem hann hefur viljað nota sína aðferð við, en þeir hafa ekki viljað viðurkenna vissa hagkvæmni í þessari aðferð og þannig neitað að fallast á að innveggir og þeir útveggir, sem um er að ræða, væru af þeirri gerð að það væri viss sparnaður í sambandi við notkun efnis.
Mér finnst aðalatriðið í þessu að það sé hægt að virkja þær stofnanir sem eiga lögum samkvæmt að sjá um að framfylgja hagræði á þessu sviði. Ég vil vekja athygli á 52. gr. laga um rannsóknastofnanir atvinnuveganna, er varðar Rannsóknastofnun byggingariðnaðarins. Hún á að sjá um, eins og stendur í 52. gr.: „endurbætur í byggingariðnaði og lækkun kostnaðar við mannvirkjagerð, þ. á m. sjálfstæðar grundvallarrannsóknir í byggingartækni, hagnýtingu húsrýmis, bæjarskipulagningu og gatnagerð. Í þeim tilgangi skal stofnunin fylgjast með nýjungum í byggingariðnaði og laga þær að íslenskum staðháttum, þ.e. kynning á niðurstöðum rannsókna og veiting upplýsinga um byggingarfræðileg efni, aðstoð við eftirlit með byggingarefnum og byggingarframkvæmdum og nauðsynleg rannsóknaþjónusta í þeim greinum sem stofnunin fæst við.“
Þetta er að mínu mati afgerandi. Einnig er við Rannsóknastofnun byggingariðnaðarins ráðgefandi sérstök nefnd sem í eiga sæti allir þeir aðilar í íslensku kerfi sem eiga að veita upplýsingar og þjónustu á þessu sviði.
Ég hef áður gagnrýnt að mér finnst vanta þarna tengsl við raunveruleikann. Ég get ekki stillt mig um að benda á eitt dæmi, því að ég hef sjálfur verið að berjast við þetta.
Það er iðnaðarmaður í Borgarnesi, sem rekur þar fyrirtæki sem hefur verið að finna upp ýmsar nýjungar í sambandi við byggingariðnað, m.a. þá nýjung, sem hann hefur verið með, að auðvelda endurbætur á húsum í sambandi við alkalískemmdir sem margir hafa talað um. Þessa nýjung hefur hann fært upp og hefur bæði gert tilraun á húsi þar á staðnum og eins sett upp líkan sem hann hefur óskað eftir að yrði skoðað og tekið til meðferðar hjá þeim aðilum sem ég nefndi áðan, Rannsóknastofnun byggingariðnaðarins og Húsnæðisstofnun ríkisins, en hann hefur ekki fengið þann stuðning sem þurft hefur á að halda. Þeir hafa tekið honum vel og sagst ætla að skoða málin, en til framkvæmda hefur ekki komið, og þann mikla kostnað, sem hann er búinn að inna af hendi við þessar tilraunir sínar, hefur hann ekki fengið upp borinn, við það að kynna þessar nýjungar eða þessar athuganir sem hann hefur gert. Þarna álít ég að þurfi að verða á breyting.
Ég vænti þess, að sú hv. nefnd, sem tekur þessi mál til meðferðar, leggi einmitt mikla áherslu á að það verði stutt rækilega við bakið á þeim sem eru að reyna að gera raunhæfar tilraunir með úrbætur á þessu sviði, þannig að það fáist úr því skorið hvort hér er um hagkvæmni að ræða eða ekki. Ég tel að það sé mjög mikilvægt fyrir alla aðila.