30.03.1982
Sameinað þing: 70. fundur, 104. löggjafarþing.
Sjá dálk 3330 í B-deild Alþingistíðinda. (2948)
366. mál, atvinnumál á Suðurnesjum
Forsrh. (Gunnar Thoroddsen):
Herra forseti. 24. júní 1981 skipaði ríkisstj. nefnd til að vinna að framkvæmd þess ákvæðis stjórnarsáttmála ríkisstj. frá 8. febr. 1980, að undirbúið verði öflugt átak til atvinnuuppbyggingar á Suðurnesjum. Í þessa nefnd voru skipaðir: Finnbogi Björnsson framkvæmdastjóri, formaður, Geir Gunnarsson alþm. og Jóhann Einvarðsson alþm. Mér hefur borist skýrsla frá nefndinni. Er hún dags. 22. mars og er svohljóðandi:
„Nefndin hóf störf 2. júlí 1981. Hún hefur m.a. rætt við allar atvinnumálanefndir á Suðurnesjum, hverja í sínu byggðarlagi, einnig við atvinnumálanefnd Suðurnesja sem er skipuð formönnum slíkra atvinnumálanefnda á Suðurnesjum. Fram hafa komið góðar ábendingar, sem unnið er frekar að, en nefndin litur á það sem einn meginþátt í verkefni sínu að styðja frumkvæði heimamanna til nýrrar eða aukinnar atvinnustarfsemi. Þá hefur nefndin unnið að og óskað eftir upplýsingum um eftirtalin málefni m.a.:
1. Úttekt á jarðhitasvæðum á Reykjanesi sem Orkustofnun hefur með höndum, jafnframt því sem nefndin hefur beitt sér fyrir því að fé yrði veitt til rannsóknar á háhitasvæðum.
2. Úttekt á hafnarstæðum á Suðurnesjum, m.a. með tilliti til efnaiðnaðar á svæðinu.
3. Nefndin hefur látið vinna frumáætlun um hugsanlega áfangauppbyggingu sjóefnasamstæðu á Reykjanesi, þ.e. saltverksmiðju, natríumklóratverksmiðju, klór- og alkalíverksmiðju, ammoníakverksmiðju og magnesíumverksmiðju. Samkv. áætluninni gætu 950 manns starfað við þær.
4. Framkvæmdastofnun ríkisins hefur tekið að sér að ósk nefndarinnar að endurvinna upplýsingar um rekstur, búnað og fjárfestingu í frystihúsum á Suðurnesjum, sem unnar voru 1978, með athugun á því, hverra umbóta er þörf nú. Telur hún að fiskvinnslu verði að færa til hagkvæmari og nýtískulegri hátta. Í því sambandi hafa nefndarmenn ásamt fulltrúum Framkvæmdastofnunar nú heimsótt 10 hraðfrystihús og fiskvinnslustöðvar á Suðurnesjum og skoðað aðstæður.
5. Þá er Iðntæknistofnun að beiðni nefndarinnar að gera úttekt á hagkvæmni þess að reisa plasttunnuverksmiðju og steinsteypueiningaverksmiðju á Suðurnesjum. Er þar m.a. jarðhiti hafður í huga við framleiðslu.
6. Nefndin er nú að ræða við forvígismenn fiskimjölsverksmiðja á Suðurnesjum og víðar um hugsanlega sameiginlega verksmiðju, m.a. á grundvelli skýrslu er unnin var að tilstuðlan sjútvrn. s.l. ár. Þótt slík verksmiðja sé ekki atvinnuaukandi, séu aðrar lagðar niður, eykur hún hagkvæmni og leysir ýmsan vanda á svæðinu, svo sem mengun.
Nefndin setti sér í upphafi þær starfsreglur að einbeita sér að þeim aðgerðum sem mættu verða til að auka hagkvæmni í rekstri fyrirtækja og styðja hugmyndir sem miðuðu að nýrri og aukinni atvinnustarfsemi, hagkvæmni í rekstri og endurskipulagningu þar sem við yrði komið. Nokkuð hefur verið um óskir um að reyna að greiða úr rekstrarfjárvanda fyrirtækja, en nefndin hefur ekki talið slíkt starfssvið sitt nema saman fari við áðurnefnd markmið.
Svo sem fyrr segir hafa ýmis mál verið skoðuð, m.a. eftir góðar ábendingar. Mesta þörfin virðist vera fyrir aukna iðnstarfsemi á svæðinu. Tekið skal fram, að upptalning verkefna nefndarinnar er með áðurgefnum upplýsingum hvergi tæmandi. Starf það, sem nefndin vinnur að, verður ekki unnið á skömmum tíma, þar sem leita þarf eftir og kalla fram frumkvæði heimamanna til að ráðast í nýja atvinnustarfsemi og framkvæma þarf síðan athuganir og rannsóknir á hagkvæmni rekstrar og tryggja fjármagn sem þarf til framkvæmda.
Nefndin væntir þess að þetta teljist fullnægjandi.“ Svo hljóðar skýrsla hinnar þriggja manna nefndar frá 22. mars, — nefndar sem hóf störf 2. júlí s.l.