22.02.1984
Neðri deild: 50. fundur, 106. löggjafarþing.
Sjá dálk 3092 í B-deild Alþingistíðinda. (2688)
159. mál, tekjuskattur og eignarskattur
Ólafur Ragnar Grímsson:
Herra forseti. Það undrar mig að ekki séu fleiri á mælendaskrá. Ég trúi því ekki að hv. þm. Þorsteinn Pálsson svari ekki þeim spurningum sem til hans var beint hér. Það væri satt að segja ærið sérkennilegur atburður í þingsögunni ef formaður stærsta stjórnarflokksins, sem hefði gert daginn áður samninga við aðila vinnumarkaðarins, neitaði að svara hér á þingi nema með þögn sinni spurningum um það efni. Því held ég herra forseti, að þessi umr. hljóti að halda áfram. Ég á a.m.k. eftir að nota rétt minn til að tala lengur. Þess vegna reikna ég með því að á kvöldfundi, sem hefst kl 9, muni þessi umr. halda áfram.
En ég vil vekja athygli á því, að þar eð ég vænti þess að vél Flugleiða frá London sé komin til landsins er hæstv. ráðh. Matthías Bjarnason, jafnelskulegur, virðulegur og skemmtilegur og hann er nú, ekki lengur fjmrh., heldur er hinn raunverulegi fjmrh mættur í landinu og hæstv. ráðh. Matthías Bjarnason, sem hér hefur talað fyrir málinu í embætti fjmrh., hefur ekki lengur umboð til að fara með málið. Ég tel þess vegna einsýnt í samræmi við almenna þingvenju að þegar þingfundur hefst hér kl. 9 til að ræða áfram um þetta mál, þá sé flm. frv., hæstv. fjmrh. Albert Guðmundsson, mættur á staðinn. Það getur enginn annar ráðh. talað fyrir hans hönd í þessum umr. (Gripið fram í: Það er betra að hafa Matthías líka.) Ég leggst ekkert gegn því að hæstv. ráðh. Matthías Bjarnason sé hér líka, bæði sem ráðh. og jafnvel í gegnum annan mann sem þm. En ég vil beina þeim tilmælum til hæstv. forseta að hann hlutist til um það í matarhléi að hinn raunverulegi fjmrh. landsins hafi hann þá ekki sagt af sér, verði kominn hér í umr. kl 9 skv. eðlilegum þingvenjum, þar eð hann er væntanlega kominn til landsins. - [Fundarhlé.]