02.04.1984
Sameinað þing: 73. fundur, 106. löggjafarþing.
Sjá dálk 4317 í B-deild Alþingistíðinda. (3680)
Varamenn taka þingsæti - rannsókn kjörbréfa
Forseti (Þorv. Garðar Kristjánsson):
Svohljóðandi bréf hefur borist:
„Reykjavík, 2. apríl 1984.
Steingrímur J. Sigfússon, 4. þm. Norðurl. e., hefur ritað mér á þessa leið:
„Þar sem ég er á förum til útlanda í opinberum erindum og get því ekki sinnt þingstörfum á næstunni leyfi ég mér með skírskotun til 138. gr. laga um kosningar til Alþingis að óska þess að l. varamaður Alþb. í Norðurl. e., Svanfríður Jónasdóttir kennari, Dalvík, taki sæti á Alþingi í fjarveru minni.“
Þetta er yður hér með tilkynnt, herra forseti, með ósk um að fram fari í sameinuðu þingi rannsókn á kjörbréfi varamanns.
Ingvar Gíslason, forseti Nd.“
Bréfi þessu fylgir kjörbréf Svanfríðar Jónasdóttur.
Þá hefur borist svohljóðandi bréf:
„Reykjavík, 2. apríl 1984.
Þórarinn Sigurjónsson, 2. þm. Suðurl., hefur í dag ritað mér á þessa leið:
„Þar sem ég er á förum til útlanda í opinberum erindum og mun ekki geta sinnt þingstörfum á næstunni leyfi ég mér með skírskotun til 138. gr. laga um kosningar til Alþingis að óska þess að 1. varamaður Framsfl. í Suðurlandskjördæmi, Böðvar Bragason, taki sæti á Alþingi í fjarveru minni.“
Þetta er yður hér með tilkynnt, herra forseti, með ósk um að fram fari í Sþ. rannsókn á kjörbréfi varamanns.
Ingvar Gíslason, forseti Nd.“
Þessu bréfi fylgir kjörbréf Böðvars Bragasonar.
Enn fremur hefur borist svohljóðandi bréf:
„Reykjavík, 2. apríl 1984.
Friðrik Sophusson, 2. þm. Reykv., hefur ritað mér á þessa leið:
„Þar sem ég er á förum til útlanda í opinberum erindum og mun ekki geta sinnt þingstörfum á næstunni leyfi ég mér með skírskotun til 138. gr. laga um kosningar til Alþingis að óska þess að vegna forfalla 2. varaþm. taki 3. varaþm. Sjálfstfl. í Reykjavík, Jón Magnússon, sæti á Alþingi í fjarveru minni.“
Þetta er yður hér með tilkynnt, herra forseti, með ósk um að fram fari í Sþ. rannsókn á kjörbréfi varamanns.
Ingvar Gíslason, forseti Nd.“
Þessu bréfi fylgir kjörbréf Jóns Magnússonar.
Enn fremur svohljóðandi bréf frá Guðmundi H. Garðarssyni:
„Reykjavík, 28. mars 1984.
Þar sem ég er á förum til útlanda á vegum Sölumiðstöðvar hraðfrystihúsanna og mun dveljast erlendis á næstu vikum get ég ekki tekið sæti á hv. Alþingi sem 2. varamaður Sjálfstfl. í Reykjavík.
Virðingarfyllst,
Guðmundur H. Garðarsson.“
Ég vil biðja hv. kjörbréfanefnd að taka kjörbréf þessi til athugunar. Á meðan verður fundinum frestað um 10 mínútur. — [Fundarhlé.]