07.11.1983
Sameinað þing: 14. fundur, 106. löggjafarþing.
Sjá dálk 577 í B-deild Alþingistíðinda. (427)
Rannsókn kjörbréfs
Forseti (Þorv. Garðar Kristjánsson):
Mér hefur borist svohljóðandi bréf:
„7. nóv. 1983.
Jón Helgason landbrh. hefur í dag ritað mér á þessa leið:
„Þar sem ég er á förum til útlanda í opinberum erindum og verð fjarverandi næstu vikur leyfi ég mér með skírskotun til 138. gr. laga um kosningar til Alþingis að óska þess, að 2. varaþm. Framsfl. í Suðurlandskjördæmi, Guðmundur Búason kaupfélagsstjóri, taki sæti á Alþingi í fjarveru minni.
Tekið skal fram að Böðvar Bragason, 1. varaþm. Framsfl. í Suðurlandskjördæmi, er nú fulltrúi Íslands á fundi Sameinuðu þjóðanna í New York.“
Þetta er yður, herra forseti, hér með tilkynnt með ósk um að fram fari í Sþ. rannsókn á kjörbréfi varamanns.
Salome Þorkelsdóttir.
forseti Ed."
Hér liggur fyrir svohljóðandi símskeyti:
„New York, 2. nóv. 1983.
Til forseta Sþ.
Þar sem ég dvelst erlendis um þessar mundir get ég ekki tekið sæti á Alþingi sem varamaður þm. Framsfl. í Suðurlandskjördæmi og óska því eftir að 2. varamaður taki sæti í minn stað.
Böðvar Bragason.“
Ég vil biðja hv. kjörbréfanefnd að rannsaka kjörbréf Guðmundar Búasonar sem hér liggur fyrir. Verður gefið fundarhlé í 5 mínútur á meðan. Fundinum er frestað. — [Fundarhlé.]