06.02.1985
Efri deild: 41. fundur, 107. löggjafarþing.
Sjá dálk 2675 í B-deild Alþingistíðinda. (2159)
243. mál, Veðurstofa Íslands
Heilbr.- og trmrh. (Matthías Bjarnason):
Virðulegi forseti. Út af fsp. hv. 2. þm. Austurl., þá held ég að það verði að bíða síns tíma að ræða frv. það sem hann sagði að félmrh. hefði boðað. Ég kæri mig ekki um að ræða hér um efni frv. sem heyra undir aðra ráðh. og sér í lagi ekki meðan það hefur ekki litið dagsins ljós í heild.
En varðandi það atriði sem snýr að Veðurstofunni og getið er í 7. lið, þá er hér um að ræða nákvæmlega sama starf og Veðurstofan hefur innt af hendi og alveg frá 1975, eitthvað svoleiðis. Hér er ekki annað verið að gera en að lögfesta það. Ef hitt frv. fer inn á þetta svið verður auðvitað að sníða þetta ákvæði af lögunum um Veðurstofu Íslands, ef Alþingi fellst á þá till. Hvað sem líður efni þessa frv., sem er ókomið fram, er það auðvitað miklu viðameira. 7. liður þýðir eingöngu að veðurathugunarmenn fylgist með þessum rannsóknum og þarna er sérstakur sérfræðingur starfandi. Þarna er ekki verið að færa umsvif neitt út.
Varðandi fsp. hv. 9. þm. Reykv., þá skýrði ég í framsögu hvað átt væri við með gjaldtöku. Það er þegar veitt er sérstök þjónusta umfram hina almennu þjónustu. Það kemur auðvitað ekki til greina að Veðurstofan fari að setja gjaldskrá fyrir almennar veðurfregnir í ríkisfjölmiðlum. Hins vegar getur alltaf komið til greina aukið og betra samstarf og einhver skipting á milli þessara tveggja ríkisstofnana og þá ekki síst Pósts og síma sem er mikilvægur þáttur í þessu.
Þm. spurði einnig hvort aðrar útvarpsstöðvar yrðu þá skyldaðar til að birta aðvaranir Veðurstofu. Það hlýtur auðvitað að fylgja löggjöf um almannavarnir og ná til miklu fleiri aðila en Veðurstofunnar. Það má setja einhver slík skilyrði ef löggjafanum þóknast svo því að þetta eru allt almenn öryggismál. En slíkt skilyrði á, að mínum dómi, ekki heima í þessu frv. út af fyrir sig.
Varðandi hvað bætist við af starfsliði verði frv. samþykkt, þá leggur frv. Alþingi eða fjárveitingavaldinu engar skuldbindingar á herðar um nýjar stöður. Hér er um verkefni að ræða sem stofnunin annast núna. Ef hins vegar á að efla einstaka þætti starfseminnar er það háð fjárveitingum hverju sinni og viðurkenningu Alþingis á því hvort fjölga eigi þar starfsfólki eða ekki. En eins og nú standa sakir hygg ég að ég megi fullyrða að það.verði ekki gerð krafa um aukna starfsemi eða aukinn starfsmannafjölda umfram það sem verið hefur á undanförnum árum. En þar kemur auðvitað margt til. Allt er þetta háð þeirri starfsemi sem unnið er að og verður að meta og vega hverju sinni.