23.05.1985
Sameinað þing: 86. fundur, 107. löggjafarþing.
Sjá dálk 5615 í B-deild Alþingistíðinda. (4863)
496. mál, stefna Íslendinga í afvopnunarmálum
Guðrún Helgadóttir:
Herra forseti. Ég vil, eins og aðrir sem hér hafa talað, þakka hv. utanrmn. fyrir að fram skuli komin sú till. sem hér liggur fyrir á þskj. 922. Ég tel að hér sé brotið blað í sögu og afgreiðslu þessara mála á hinu háa Alþingi og því beri að fagna.
Hv. síðasti ræðumaður hefur þegar getið þeirra tillagna sem hér hafa legið fyrir þinginu í vetur svo að ástæðulaust er að vera að endurtaka það. En sem 1. flm. till. til þál. á þskj. 239, um bann við geymslu og notkun kjarnorkuvopna á íslensku yfirráðasvæði, vil ég lýsa því yfir að ég tel að hv. utanrmn. hafi verulega komið til móts við það sem þar er lagt til. Vissulega var meginefni þeirrar till. að ríkisstj. yrði falið að hefja nú þegar undirbúning að löggjöf um bann við geymslu og notkun á hvers konar kjarnorkuvopnum hér á landi. En ég tel að þó að þess sé ekki getið í till., sem hér liggur fyrir, þá sé hún samt sem áður verulegt skref því að verði hún samþykkt er um ótvíræðan vilja hv. Alþingis að ræða.
Ég held að öll umr. um þessi mál hafi tekið miklum framförum á allra síðustu árum og ég er sannfærð um að stofnun öryggismálanefndar á í því verulegan þátt. Ég tel ástæðulaust að árétta það að því meiri upplýsingar sem liggja fyrir hv. þm. um þessi mál, því meiri líkur eru á að þingið geti rætt þau málefnalega og af nokkurri þekkingu, þeirri þekkingu sem við höfum möguleika á að afla okkur, og þar af leiðandi af meiri stillingu og skynsemi en oft hefur átt sér stað áður.
Ekki ber síst að fagna því atriði sem fram kemur í 2. mgr. þeirrar till. sem hér liggur fyrir, um að því gífurlega fjármagni, sem nú fer til hernaðaruppbyggingar, verði fremur varið til þróunaraðstoðar. Sú till. sem hér var samþykkt áðan er frekari ítrekun á því.
Varðandi það atriði í 6. mgr. þeirrar till. sem utanrmn. hefur lagt fram þar sem segir að Alþingi árétti þá stefnu Íslendinga að á Íslandi verði ekki staðsett kjarnorkuvopn, þá held ég að það hljóti að skiljast á sama hátt og gert er ráð fyrir í till. okkar á þskj. 239, að þar sé átt við: hvorki í friði né ófriði.
Herra forseti. Ég skal ekki tefja það að þessi till. nái fram að ganga. Ég held að hver einasta hugsandi manneskja geri sér ljóst að framtíð mannkynsins er undir því komin að þm. heimsbyggðarinnar hafi manndóm í sér til þess að ræða þessi mál af skynsemi og viti og geti tekið höndum saman að stöðva þá vitfirringu sem vígbúnaðarkapphlaupið er. Ég tel að Íslendingar hafi með þessari till., sem ég efast ekki um að nái hér samþykki, lagt verulegt lóð á þá vogarskál og ég vil þakka hv. formanni utanrmn. og samnm. hans fyrir afgreiðslu þessa máls.