04.02.1986
Sameinað þing: 40. fundur, 108. löggjafarþing.
Sjá dálk 2303 í B-deild Alþingistíðinda. (1935)
183. mál, eiginfjárstaða ríkisbankanna
Samgrh. (Matthías Bjarnason):
Herra forseti. Það er réttur skilningur hjá hv. síðasta ræðumanni. Hins vegar verður einnig að taka tillit til þess að þessir viðskiptamenn eru auðvitað með margvísleg veð og sum mjög góð og flest vonandi góð nema hjá þeim eina sem orðið hefur fyrir skakkafalli. En eftir að skýrslan kom um Útvegsbankann, ég held 12-13 dögum eftir að ég varð viðskrh., óskaði ég þegar í stað eftir skýrslu um hina tvo ríkisbankana. Að þeirri skýrslu er nú unnið og, eins og ég sagði í svari við þessari fsp., er von á henni í þessum mánuði þannig að upplýsingar í þeim efnum eiga vonandi að liggja fyrir fyrir mánaðamót.
Út af fsp. hv. 2. landsk. þm. hef ég hugleitt að flytja frv. um breytingu á lögum um viðskiptabanka, um þak á lán til einstakra aðila, en það er vandasamt verk og þessi lög eru nú nýkomin til framkvæmda, eða búin að vera í rúman mánuð. Að vissu leyti eru ýmsir erfiðleikar á framkvæmd þeirra laga vegna þess að frv. um Seðlabanka átti að vera samhliða þessum viðskiptabankalögum, en það liggur nú hér fyrir Alþingi og kemur til umræðu. Að mörgu er því að hyggja í þessum efnum, en þetta er eitt af því sem við höfum mjög verið að hugleiða í ráðuneytinu.
Hins vegar er því ekki að leyna, og það er mín skoðun, að nauðsyn er á að setja ríkisábyrgð á starfsemi ríkisbanka einhverjar skorður og setja meira aðhald á bankastjórnir viðskiptabankanna þannig að þessar ábyrgðir séu ekki galopnar. Ég tel líka koma til greina að setja löggjöf um ríkisábyrgðir sem nái einnig að einhverju leyti til einkabanka þannig að þeim sé ekki haldið algerlega utan við. En þetta er mjög vandasamt verk.
Þetta ræddi ég síðast í gær við fremstu menn á þessu sviði og það var ákveðið að hugleiða þetta mál allt og festa niður á blað og reyna að láta fyrstu drög koma fram sem allra fyrst sem við gætum svo frekar rætt um og gert fullkomnari eftir að nánari umræður eiga sér stað.