22.10.1985
Sameinað þing: 5. fundur, 108. löggjafarþing.
Sjá dálk 107 í B-deild Alþingistíðinda. (82)
33. mál, kennarastöður
Fyrirspyrjandi (Hjörleifur Guttormsson):
Herra forseti. Það kemur fram í svari hæstv. ráðh. að
réttindalausum kennurum við störf hefur fjölgað stórkostlega á nýbyrjuðu skólaári þar sem þeir eru
ekki fjarri því, sýnist mér, að vera um 40% af heildartölu réttindalausra sem eru starfandi á landinu
öllu. Ég tek það fram að mér er ljóst að í hópi þessara starfsmanna skólanna eru margir ágætismenn og
hæfir menn, en það breytir ekki hinu að það hlýtur að vera keppikefli yfirvalda menntamála í landinu
að tryggja að eingöngu starfsmenn með full réttindi ráðist þar til starfa.
Annað sem kemur fram í svari hæstv. ráðherra er það að hér hallar fyrst og fremst á
landsbyggðina. Reykjavík er aðeins með 13 réttindalausa menn í starfi af 441. Þetta er því mál sem
snertir byggðaþróun í landinu, jafnrétti þegnanna í landinu, barnanna í landinu.
Hæstv. ráðherra svaraði 3. lið fsp. nokkuð almennum orðum, en nefndi þó þar atriði sem ég geri
ráð fyrir að forveri hans í starfi, hafi hann lagt við hlustir, hafi hlustað á af nokkurri athygli, að efla
menntun kennara og Kennaraháskóla Íslands sérstaklega og að bæta kaup og kjör kennara. Þetta eru
hvort tveggja atriði sem hægt er að taka undir og það hefði sannarlega verið æskilegt að Sjálfstfl. og
hæstv. ríkisstj. hefðu á síðasta skólaári staðið að málum með þeim hætti sem hæstv. núv. menntmrh.
var að láta liggja að að nauðsynlegt væri til að tryggja skólanum starfskrafta með fullum réttindum. Og
ég er viss um að kennarastéttin í landinu á eftir að ganga eftir því við hæstv. núv. ráðherra hvernig hann
vilji koma þessum málum fram í ljósi orða sinna áðan.
Menntun kennara, störf kennara eru einhver þau þýðingarmestu sem unnin eru í landinu og það er
sjálfsagt mál að til kennara séu gerðar miklar kröfur, en þá á líka samfélagið að endurgjalda og meta
starfið í ljósi gildis þess fyrir samfélagið.