26.11.1986
Efri deild: 15. fundur, 109. löggjafarþing.
Sjá dálk 1170 í B-deild Alþingistíðinda. (1008)
186. mál, Húsnæðisstofnun ríkisins
Kolbrún Jónsdóttir:
Virðulegi forseti. Hér hafa farið fram fjörugar umræður um verð á húsnæði víðs vegar um landið, en ég sakna þess í þeim töflum sem hér koma fram að það skuli ekki vera tekið til Sauðárkróks. Þar hefur greinilega komið fram hvernig ríkið getur haft áhrif á fasteignaverð úti á landi án þess að keppa um kaup á íbúðum heldur með uppbyggingu í atvinnuskapandi tilliti. Í þessari töflu væri mjög fróðlegt að hafa t.d. Sauðárkrók.
Hér hafa menn minnst á hitunarkostnað og ekki skal ég efa að hitunarkostnaðurinn hefur áhrif á íbúðaverð. En þá vil ég benda á eina mótsögn sem hér er. Hitunarkostnaður á Húsavík er mjög lágur, en á Húsavík er ekki mjög hátt verð á íbúðarhúsnæði. Við verðum að leita orsakanna víðar en í hitunarkostnaði.
Það er byggðastefna sem þarf að efla og leita þeirra leiða til úrbóta sem raunhæfar eru. Það er ekki auðvelt að benda á eina leið. Ég tel að sú leið sé sú að efla þann frjálsa markað sem flm. talaði um áðan að væri af hinu illa ef ég skildi orð hans rétt. Ég held að sú leið sem hér er lögð til ýti undir og hækki verð á hinum frjálsa markaði. Ef það er ekki svo hef ég gjörsamlega misskilið frv. Hvað annað kemur til greina ef þessi sjóður mundi kaupa þrjár til fimm íbúðir á einhverjum stað og mundi þar af leiðandi efla verðið á markaðnum? Er það nema til þess að hækka verðið á hinum frjálsa markaði? Auk þess held ég, ef slík leið yrði farin, að það yrði þvílík miðstýring að þrír til fjórir menn héðan úr Reykjavík yrðu á ferðalagi víðs vegar um landið að leita að kaupum á íbúðarhúsnæði. Það yrðu sennilega pólitískt kjörnir fulltrúar sem mundu hafa úr 14-15 íbúðum að velja. Eftir hverju ættu þeir að fara? Hvaða íbúð ættu þeir að kaupa? Væri það sú fyrsta sem var sett á söluskrá?
Ég held að það væri mjög erfitt að fara þessa leið. En ég tek undir það, sem hér hefur komið fram, að finna þarf leiðir til að sporna við þeirri þróun sem hefur átt sér stað á landsbyggðinni.
Ég saknaði þess eiginlega að hv. þm. Skúli Alexandersson skyldi ekki ræða efnislega um frv. Ég saknaði þess virkilega því ég hefði viljað heyra hans rök fyrir því að þetta væri sú leið sem ætti að fara. Ég hélt að hann hefði a.m.k. þann skilning á atvinnumálum á landsbyggðinni að það þyrfti að koma til efling þar til að snúa þessari þróun við en ekki að kaupa upp húsnæði. Ég bendi á að meira að segja víða þar sem atvinnulíf er mjög blómlegt er skortur á leiguhúsnæði en fólk vill ekki kaupa eða fjárfesta. Ég get ekki svarað þeirri spurningu hvers vegna svo er. En þetta er víða. T.d. í kjördæmi hv. 1. flm. að þessu máli, á Siglufirði, er því þannig farið. Ég held að sú nefnd sem fær þetta mál til umfjöllunar ætti að kanna mjög ítarlega hvar skórinn kreppir að og koma þá með tillögur til úrbóta.