18.11.1986
Sameinað þing: 18. fundur, 109. löggjafarþing.
Sjá dálk 957 í B-deild Alþingistíðinda. (824)
Hrun rækjustofnsins í Húnaflóa
Ólafur B. Óskarsson:
Herra forseti. Ég þakka hv. þm. Þórði Skúlasyni fyrir að vekja athygli á þessu máli sem er mjög alvarlegt fyrir byggðirnar við Húnaflóa. Í þessum tiltölulega smáu byggðarlögum verður hrun í einni atvinnugrein til muna alvarlegra en gerist í stærri samfélögum. Þetta er stærri hluti af atvinnulífi þar en víða annars staðar gerist. Við það bætist að í mörgum þessara byggðarlaga er um mjög litlar botnfiskveiðar að ræða og þeim mun verra við þetta mál að fást.
Það voru nokkur vonbrigði að heyra það og sjá á hæstv. sjútvrh. að hann væri tæpast meðmæltur því að auka möguleika til botnfiskveiða, þ.e. dragnótaveiða og annarra sem til greina kæmu, því að hugsanlega gæti það lagað stöðuna nokkuð í þessum málum. T.d. er á Hvammstanga aðstaða a.m.k. til saltfiskverkunar.
Það vakna margar spurningar í sambandi við þessar rækjuveiðar. Það hefur verið geysilega mikil aukning í þessum veiðum á undanförnum árum og uppbygging rækjuverksmiðja og hefur sumum vissulega þótt nóg um og óttast að þetta gæti endað með ósköpum áður en lyki. Að vísu hefur verið stjórn á innfjarðarækjunni um nokkuð langan tíma, en það á ekki það sama við um úthafsrækjuna. Það hefur ekki verið annað að heyra á rannsóknarmönnum, og mig minnir helst að ég hafi heyrt það á hæstv. sjútvrh. líka, en að það væri ekkert annað við þetta að gera en veiða og láta reyna á hvað stofninn þyldi. Þá er spurningin: Hvað skeður þegar kemur að mörkunum og hrun verður?
Ég legg áherslu á nauðsyn þess að verksmiðjurnar á þessu svæði verði aðstoðaðar við t.d. tilraunavinnslu í tengslum við rannsóknir þær sem gerðar yrðu á öðrum tegundum sem veiða mætti, þær yrðu aðstoðaðar við tilraunavinnslu og markaðssetningu á þeim afurðum sem þar kæmu til greina. Þetta gæti hugsanlega bætt nokkuð úr.