04.02.1988
Sameinað þing: 44. fundur, 110. löggjafarþing.
Sjá dálk 4343 í B-deild Alþingistíðinda. (2996)
Staðan í efnahags- og kjaramálum
Albert Guðmundsson:
Hæstv. forseti. Ég vil eiginlega óska eftir því að þessari umræðu verði hér með frestað ef það er ekki ætlunin að halda áfram. Forsrh. hefur gefið tilefni til að halda áfram. Ég hafði búið mig undir það að hætta og má segja hætti í miðri ræðu. Ég á mikið eftir af minni ræðu. Ég óska eftir því að þessari umræðu verði frestað og hún megi halda áfram sem fyrst, hvort sem það verður í nótt eða í annan tíma því að síðustu ummæli hæstv. forsrh. gefa mér tilefni til þess að lýsa hann enn þá einu sinni og nú úr ræðustól hér í Alþingi ósannindamann. Frummælandi leiðrétti hæstv. forsrh. með mildara máli en ég geri nú, þannig að við erum tveir ræðumenn í kvöld búnir að lýsa hann hvor á sinn hátt ósannindamann. Ég hef gert það áður. Og vegna ummæla sinna hefur hæstv. forsrh. gefið mér tilefni til að halda minni ræðu áfram, sem ég annars hefði ekki gert, þannig að ég verð að fara fram á það að fundinum verði frestað úr því að umræður geta nú ekki haldið áfram, að mér hefur skilist.