30.04.1988
Sameinað þing: 74. fundur, 110. löggjafarþing.
Sjá dálk 7130 í B-deild Alþingistíðinda. (5149)

420. mál, útsendingar veðurfregna

Flm. (Ingi Björn Albertsson):

Herra forseti. Ég mæli fyrir till. til þál. á þskj. 770 um útsendingar veðurfregna. Flm. ásamt mér eru hv. þm. Borgarafl. Júlíus Sólnes, Óli Þ. Guðbjartsson og Guðmundur Ágústsson.

Till. hljóðar svo, með leyfi forseta:

„Alþingi ályktar að skora á menntmrh. að beita sér fyrir því að veðurfregnir verði í framtíðinni sendar út samtímis á öllum útvarpsstöðvum og rásum þeirra.“

Herra forseti. Það er skoðun flm. að með því að koma upp samtengingu veðurfregna frá öllum útvarpsstöðvum sé stigið stórt skref í öryggismálum þegnanna.

Það er nánast sama hvar gripið er niður í þjóðfélaginu í dag, alls staðar má segja er opið fyrir útvarp, enda orðin mikil breyting hvað þau mál varðar síðustu árin með fjölgun útvarpsstöðva. Þess vegna er veruleg hætta á því að veðurfregnir fari fram hjá mönnum sem alls ekki ættu að láta slíkt henda sig. Nægir að benda á sjómenn, þá aðila í þjóðfélaginu sem hvað síst mega við því að missa af veðurfregnum. Með slíkri samtengingu veðurfregna, sem hér er farið fram á, er reynt að koma í veg fyrir að nokkur maður sem á annað borð er með opið fyrir útvarp missi af veðurfregnum.

Ég ætla ekki að eyða tíma þingsins í að nefna dæmi slíkri till. til stuðnings, einfaldlega vegna þess að ég tel ekki nauðsyn á því. Sjálfum finnst mér að hér sé um svo sjálfsagt mál að ræða að þingmenn hljóti að veita því brautargengi.

Ég vil að það komi fram hér í umræðunni að eins og menn vita sendir Ríkisútvarpið út viðamiklar veðurfregnir sem er eðlileg þjónusta ríkisfyrirtækis, en hins vegar ekki samtímis á báðum rásum. Ég vil einnig að það komi skýrt fram að það er skoðun mín að ekki eigi að skikka aðrar útvarpsstöðvar til slíkrar þjónustu heldur verði leitað leiða til að ná fram slíkri þjónustu án lagasetningar eða kvaða. Ég tel að um þetta megi ná samstöðu hinna frjálsu útvarpsstöðva, í það minnsta er það tilraunarinnar virði.

Ég hef talað við fulltrúa hinna frjálsu útvarpsstöðva og voru þeir í raun ekki par hrifnir af þessari till. sumir hverjir þó þeir tækju fyllilega undir öryggissjónarmiðið. Hins vegar kom fram í þeim viðræðum óánægja með þjónustu Veðurstofunnar sem þeir töldu eyða allt of miklu púðri í veðurfræði en of litlu í veðurspár. Ég varpa þessu fram til umhugsunar. Þeir lýstu hins vegar fullum vilja á að ræða málið og vildu alls ekki þvertaka fyrir að hægt væri að komast að niðurstöðu.

Ég tel að ef til þess kæmi að veðurfregnum yrði útvarpað samtímis á öllum rásum yrði Veðurstofan að vinna miklu styttri og hnitmiðaðri veðurspár en nú er gert, spár er tækju helst ekki lengri tíma í flutningi en þrjár mínútur og í hæsta lagi fimm mínútur. Fyrir slíka þjónustu yrði síðan að greiða útvarpsstöðvunum.

Herra forseti. Ég held að ég hafi þetta ekki lengra. Ég óska eftir því að að lokinni umræðu verði till. send hv. menntmn. til umsagnar og 2. umr. Skúli Alexandersson:

Herra forseti. Ég tek undir efni þessarar till., en um leið langar mig til að vekja athygli á þeirri umræðu sem átt hefur sér stað í sambandi við útsendar veðurfregnir, þ.e. á hvaða tíma þær eru sendar út og hvaða tíma veðurfræðingar hafa til að undirbúa útsendingu veðurfregna.

Nú þegar flestir Íslendingar eru orðnir sínir eigin veðurspámenn eftir að hafa fengið veðurspána og veðurútlitið í sjónvarpsmynd inn í stofu til sín, a.m.k. einu sinni á dag, gera menn sér grein fyrir því hvað veðurstaðan umhverfis Ísland getur verið breytileg og hvað nauðsynlegt er að veðurfregnirnar séu sem nákvæmastar og að þær upplýsingar sem veðurfræðingar hafa með höndum séu sem best unnar. Sú umræða hefur verið í gangi að veðurfregnirnar séu sendar of fljótt út miðað við þær upplýsingar sem Veðurstofan fær. Ég er því miður ekki með þau gögn í höndunum sem æskileg væru í sambandi við þessa umræðu. Ég hefði búið mig betur undir umræðuna ef ég hefði gert ráð fyrir því að umræða um þessa till. yrði nú. Páll Bergþórsson veðurfræðingur hefur í ræðu og rituðu máli talið æskilegt að veðurfregnirnar væru sendar út á öðrum tíma en núna er gert og byggt þá skoðun sína á því að með því að færður væri til veðurfregnatíminn mundu veðurfregnirnar sem við fáum daglega vera miklu öruggari.

Ég vildi aðeins grípa tækifærið í umræðu um þessa till. til að benda á þennan þátt og undirstrika hvað veðurfregnirnar, upplýsingar um veður á landinu, eru mikilsverður þáttur í okkar lífi, bæði í sambandi við það að nýta okkar aðstöðu í landinu til landbúnaðar og til sjávar og svo til þess að veðurfregnirnar séu sem öruggastar til þess að forða slysum.