23.08.1912
Neðri deild: -1. fundur, 23. löggjafarþing.
Sjá dálk 1075 í B-deild Alþingistíðinda. (1521)
59. mál, þingfararkaup alþingismanna
Bjarni Jónsson:
Eg lýsi yfir því, að eg mun greiða atkvæði með tillögu hv. 1. þm. Skagf. Það á bezt við eftir þeim ummælum, sem fallið hafa á þessu þingi um ferðareikninga og annað, að menn sýni, hvern áhuga þeir hafa á þingmálum án dagpeninga, og vil eg gjarna vera með í þeim hóp.
En eins og eg sagði síðast, hygg eg að þetta frumv. eigi ekkert erindi á þetta þing. Frv. er flýtisverk og þarf betri undirbúning. En það er skrítið, að sjá ferðakostnað úr kjördæminu Danmörk ætlaðan 190 kr. (Pétur Jónsson: Sýslan Danmörk). Ojá, en það er meinlaus misskilningur og gerir ekki til. En hvernig á sá þingmaður að fá bæði ferðakostnað og dagpeninga að auki. Þetta er matur fyrir hv. þm. Seyðf., og býst eg við að hann athugi þetta ákvæði og leggi til að fella það eða setja nefnd í það. Hér er að minsta kosti ástæða fyrir hann til að koma með fyrirspurn.
Annars er eg helzt á því að fella þetta frv. vegna ónógs undirbúnings, ella er eg samþykkur till. hv. 2. þm. Skagf.