24.07.1913
Efri deild: 15. fundur, 24. löggjafarþing.
Sjá dálk 256 í B-deild Alþingistíðinda. (1703)
35. mál, ný nöfn manna og ættarnöfn
Kemenz Jónsson, umboðsm. ráðh.:
Jeg átti von á, að nefndin kæmi með margar brtill. við þessa umr. og sú von hefur rætzt. En jeg átti líka von á, að fleiri þeirra yrðu til bóta, en sú von hefur ekki rætzt.
Það er aðeins ein brtill. nefndarinnar, er jeg tel til verulegra. bóta, og hún er við 4. gr., c. liður, að í stað orðanna, „sem skilgetinna“ komi: „ef faðerninu er játað“. Nefndinni var bent á þetta við 2. umr., að það væri harla óviðkunnanlegt, að láta óskilgetin börn hafa rjett til ættarnafns föður síns, hvernig sem á stóð, og þetta hefur hún tekið til greina: aðrar brtill. hennar eru meinlausar og gagnslausar, að því er mjer finst. Þetta mál fer nú til neðri deildar, og reynslan leiðir því í ljós, hvort hún lagar það nokkuð eða ekki.
Brtill. á þgskj. 160 er til verulegra bóta, og hefði slíkt ákvæði, sem hún fer fram á, að setja í frv., í rauninni átt að vera í frumvarpinu, þegar það kom frá stjórninni.
Jeg skal geta þess, að það hefur komið fyrir, eins og háttv. þm. Árn. (J. J.) mintist á, að skrár hjer hafa verið gefnar út, þar sem föðurnöfnin voru talin á undan fornöfnunum, og jeg veit, að stjórnarráðinu hefur verið kent um þetta. En jeg vil nota tækifærið til að lýsa yfir því, að það á engan þátt í því, að þessu var þannig fyrirkomið í talsímaskránni. Það hafði enga hugmynd um það, fyr en hún var komin út. Jeg hygg, að hún hafi verið svona útbúin, að minsta kosti meðfram af því, að niðurjöfnunarskráin var svona gerð, og var það í rauninni engin furða, þó að menn færu í sama farið, því að í niðurjöfnunarnefnd hefur átt sæti maður, er næma tilfinning hefur á íslenzku máli, og þó hefur þessi afskræmisskrá komið þaðan. Jeg vil því mæla hið bezta með þessari brtill. á þgskj. 160 og vona, að hún verði samþykt.