13.07.1914
Neðri deild: 10. fundur, 25. löggjafarþing.
Sjá dálk 998 í B-deild Alþingistíðinda. (973)
45. mál, ritsíma og talsímakerfi Íslands
Pétur Jónsson:
Eg hefði ekki staðið upp ef eitt atriði í skýrslu háttv. flutn.m. (St. St.) um málið hefði ekki verið stórum villandi. Hann skýrði frá því, að það sem mælti með því, að Siglufjarðarstöðin væri gerð að 1. flokks stöð, væri hinar gífurlega háu tekjur af þessum síma í samanburði við aðra. Tekjurnar væri yfir 11. þús. kr. En hann gleymdi að geta þess, að mikill meiri hluti af þessum tekjum gengur út úr landinu til sæsímans. Það er vitanlegt, að Íslandi ber ekki nema 1/10 hluti að tekjum sæsímans. Þegar tillit er tekið til þess, þá verða tekjur landsjóðs af þessum síma, netto um 4 þúsund kr. Eg hefi hlýtt landsímstjóranum yfir þetta og spurt hann, hvort þessi simi gæfi meira af sér en aðrir símar í hlutfalli við stofnkostnað og tilkostnaðinn við rekstur hans og alla starfrækslu. Og hann hefir sagt mér, að sér væri óhætt að fullyrða, að ýmsir aðrir símar, svo sem Keflavíkursíminn, Húsavíkursíminn, Patreksfjarðarsíminn og jafnvel fleiri símar, stæði þessum síma fullkomlega jafnfætis, ef ekki framar, hvað tekjurnar snertir, og ætti þær því jafnmiklar kröfur til i. flokks hlunninda og hann. Eg vil ennfremur benda á, að þessar tekjur koma að langmestu leyti frá útlendingum, sem dvelja á Siglufirði lítinn part úr sumri og þess vegna er það ekki tilfinnanlegt fyrir Siglfirðinga, þó að þar sé borguð nokkuð há símagjöld. Loks vil eg minna á, að það er mjög óheppilegt að færa þennan síma og fleiri í 1. flokk nú, þar sem 5 ára samningurinn um þjónustu símans er úti á næsta ári. En þann milliveg mætti fara að auka símaþjónustuna að einhverju leyti eða auka tillag landsjóða til hennar. Það væri miklu nær en hitt.