14.08.1917
Neðri deild: 33. fundur, 28. löggjafarþing.
Sjá dálk 620 í B-deild Alþingistíðinda. (190)
2. mál, fjáraukalög 1914 og 1915
Fjármálaráðherra (B. K.):
Út af orðum háttv. 1. þm. Skagf. (M. G.) skal jeg taka það fram, að þar sem hann sagði, að stjórnin hefði átt að geta vitað, hvað sparast hefði á árinu 1915, þegar hún svaraði athugasemdunum við landsreikninginn 1914, þá er það hlutaðeigandi skrifstofustjóri, sem svörin semur, en tími stuttur fyrir mig að athuga, hvernig sakir stóðu. En þetta haggar ekki þeirri grundvallarreglu, sem jeg hefi haldið fram í dag að fylgja ætti við það, hvað taka bæri upp fjáraukalög og hvað ekki. En hvað sem þessu líður, þá hefði nefndin átt að athuga landsreikninginn sjálfan áður en hún samdi tillögur sínar. Það er ekki langrar stundar verk. Jeg sjálfur skoðaði þar í morgun öll þau atriði, sem ágreiningur er um, og tók það skamman tíma fyrir mig.
Jeg hefi í sjálfu sjer ekki á móti því, þótt allar þær upphæðir sjeu færðar í fjáraukalög, sem háttv. nefnd leggur til að gert sje, en jeg held því fram, að það sje sama sem að veita sama fjeð tvisvar, og í sjálfu sjer er það rangt; en ef þingið vill hafa það svo, þá er ekki annað en að það leggi það fyrir stjórnina, og mun hún fara eftir því.
Háttv. þm. V.-Ísf. (M. Ó.) fanst ekki rjettu formi fullnægt nema alt væri tekið í fjáraukalög, sem veitt væri á nokkurn annan veg en bókstaflega eftir orðum fjárlaganna; þar er jeg honum ekki samdóma, eins og þegar hefir verið tekið fram.
Skal jeg svo ekki fjölyrða um þetta, en vona, að ekki verði annað samþykt en jeg hefi bent á að samþykkja eigi, án þess að jeg geri það þó að kappsmáli.