01.08.1917
Neðri deild: 22. fundur, 28. löggjafarþing.
Sjá dálk 1255 í B-deild Alþingistíðinda. (964)
60. mál, kynbætur hesta
Frsm. (Sigurður Sigurðsson):
Jeg get verið mjög stuttorður um mál þetta. Landbúnaðarnefndin, sem fjallaði um það, leggur til að gera á frv. um kynbætur hesta 2 ofurlitlar breytingar. Jeg geri ráð fyrir, að menn hafi áttað sig á þessum breytingum og þyki þær sjálfsagðar. Fyrsta brtt. er við 1. gr. og önnur brtt. við 2. gr. Eftir 1. gr. og breytingartillögunni, verði hún samþykt, verður aðalreglan að banna lausagang graðhesta eldri en l½ árs, en heimila þó undantekningar með þá graðhesta, sem ætlaðir eru til kynbóta eða undaneldis.
Önnur brtt. er að eins í því fólgin, að í stað þess, að sektirnar eru í frv. ákveðnar alt að 100 kr., skuli lágmark þeirra vera 10 kr. og hámark 100 kr., er renni í sveitarsjóð.
Jeg vænti þess, að háttv. deild samþykki frv. og brtt. Og segi jeg svo ekki meira um þetta að sinni.