05.05.1923
Neðri deild: 58. fundur, 35. löggjafarþing.
Sjá dálk 75 í D-deild Alþingistíðinda. (3053)
144. mál, póstflutningur í Skaftafellssýslum
Lárus Helgason:
Af því að jeg býst við því, að hv. þdm. komi þessi tillaga ókunnuglega fyrir, en jeg er þessu málefni kunnugri en aðrir hv. þdm., þá ætla jeg með fáeinum orðum að skýra frá, hvað hjer er um að ræða.
Þessi hugmynd, er hjer kemur fram, er engan veginn ný. Samskonar aðferð og hjer er átt við hefir verið reynd í Skaftafellssýslu áður, einkum við að koma kjöttunnum út í Skaftfelling og fleiri báta, og gefist vel. í fyrsta skiftið gekk ekki nema sólarhringur til þess að fullferma bátinn, og var þó alveg ófær sjór, svo að engin tök hefðu verið á að ferma hann á annan hátt. í síðari skiftin, sem þetta var gert, gekk það einnig sæmilega; helsti ókosturinn við það var, að kaðallinn vildi slitna eða nuggast í sundur. En með ljett hylki er engin hætta á að það verði, svo að líkur eru til, að þetta geti gengið, að minsta kosti á sumrin, en aftur er óvíst, hvort hægt verður að koma því við á veturna, ef hafrót er. Og þar sem kostnaður við þetta er svo sáralítill, þá er rjettmætt að þetta nýmæli sje reynt. Þegar sjór er dauður, verður að sæta lagi að setja dufl við stjóra utan við brimgarðinn og vað í land, sem svo mætti nota til millidráttar þegar skip koma með póst, ef sjór væri ófær.
Það eru nú um 30 ár síðan fyrst voru fluttar vörur í land í Skaftafellssýslu, og ekki nema 5 ár síðan farið var að skipa vörum bæði í land og úr landi við Skaftárós og Ingólfshöfða. Þetta var talið ómögulegt til þess tíma, sem byrjað var á þessu, en alt hefir gengið vel.
Vona jeg, að hv. deild sje því hlynt, að þessar tilraunir sjeu gerðar, og samþykki þessa till.