25.04.1924
Efri deild: 54. fundur, 36. löggjafarþing.
Sjá dálk 1788 í B-deild Alþingistíðinda. (3454)
62. mál, kosningar í bæjarmálefnum Reykjavíkur
Eggert Pálsson:
Jeg hefi skrifað undir þetta nál. með fyrirvara, og vil jeg með nokkrum orðum gera grein fyrir honum. Jeg álít sem sje ekki rjett, að þeir menn, sem engan eyri greiða til sveitarþarfa eða bæjar, eigi kosningarrjett í sveitar- og bæjarmálefnum. Það er eðlilegt, að menn hafi kosningarrjett til þings án tillits til beinna opinberra útgjalda, vegna þess að þeir greiða meira og minna til landssjóðsþarfa óbein gjöld. Má því skoða þessa menn sem skattgreiðendur í landssjóð. Hjer eru menn ekki taldir skattgreiðendur í sveitarsjóð, ef ekkert er á þá lagt. Þess vegna er skakt, að þeir hafi öll rjettindi í sveitarmálefnum á við hina, sem gjöldin greiða. Þó þetta yrði að lögum hvað Reykjavík snertir, þá vil jeg ekki láta það mynda fordæmi fyrir landsbúa alla í heild, þannig, að allir fengju atkvæðisrjett í sveitar- eða bæjarmálum, þótt þeir greiði ekkert til sveitar- eða bæjarþarfa. Jeg viðurkenni, að það sparar afarmikið ómak hjer í Reykjavík að nota sömu kjörskrá bæði við bæjarstjórnar- og alþingiskosningar. Jeg skil, að það hlýtur að kosta mikið að semja nýja kjörskrá til kosninga í bæjarmálefnum og geta ekki stuðst við alþingiskosningakjörskrána. Þess vegna setti jeg mig ekki beint upp á móti frv. þessu, heldur skrifaði undir nál. aðeins með fyrirvara. Jeg vil því ekki leggja beint á móti frv., en jeg vil ekki, að það verði til að skapa fordæmi fyrir sveitirnar. Í sveitum er engin nauðsyn á þessu fyrirkomulagi; þar er ekki svo erfitt að taka saman kjörskrárnar.