11.05.1926
Neðri deild: 76. fundur, 38. löggjafarþing.
Sjá dálk 651 í D-deild Alþingistíðinda. (3285)
120. mál, færsla póstafgreiðslustaðar
Benedikt Sveinsson :
Þetta mál varðar hvorki mig nje kjördæmi mitt. En jeg er nokkuð kunnugur norður þar. Get jeg tekið í sama streng og hv. flm. (IngB). Breytt atvik valda því, að heldur skuli vera póstafgreiðsla á Breiðumýri en á Grenjaðarstöðum. Síðan braut kom milli Breiðumýrar og Húsavíkur eru Grenjaðarstaðir úr leið.
Það er á hinn bóginn skiljanlegt, að óskir komi fram um það frá þeim, sem búa í nágrenni við Grenjaðarstaði, að póstafgreiðslan verði ekki flutt. Er þeim það bæði metnaðarsök og hagræði nokkurt, enda eru allir því sammála, að eftir sem áður verði þar póstafgreiðsla fyrir þá sveitarhluta. Pósti vestan yfir Fljótsheiði yrði þá skift á Breiðumýri og hjeldi áfram til Grenjaðarstaða það, sem þangað á að fara, en hitt beint eftir akveginum til Húsavíkur. (Atvrh. MG: Till. fer fram á að flytja póstafgreiðsluna burtu). Já, en mjer skilst á flm., að brjefhirðing yrði áfram á Grenjaðarstöðum. Það er svo sem sjálfsagður hlutur, og sýnist mjer, að þá sje einskis hlutur fyrir borð borinn.
Um póstafgreiðslu á báðum stöðunum er það eitt athugandi, að örskamt er á milli, svo sem hálfs annars tíma ferð. Þætti því sumum e. t. v. óþarft að hafa þar tvær póstafgreiðslur. En nú er upplýst, að enginn sje kostnaðarmunur, hvort heitir póstafgreiðsla eða brjefhirðing, og þá skiftir engu, þótt afgreiðslan á Grenjaðarstöðum haldi sínu nafni. Býst jeg varla við, að slíkt mundi verða gert að kappsmáli. En vegna nýja vegarins til Húsavíkur sýnist mjer hagkvæmara, að póstafgreiðsla sje á Breiðumýri eða Einarsstöðum.