29.03.1926
Neðri deild: 43. fundur, 38. löggjafarþing.
Sjá dálk 261 í B-deild Alþingistíðinda. (63)
1. mál, fjárlög 1927
Ólafur Thors:
Jeg á hjer eina smábrtt. á þskj. 230,XXII, um styrk til ungfrú Önnu Borg, til leiklistarnáms erlendis. Þessi unga stúlka, Anna Borg, vakti þegar í barnæsku eftirtekt listelskra manna hjer í bæ, og hefir nú vakið aðdáun margra. Leikfjelag Reykjavíkur hefir falið henni ýms vandasöm hlutverk, og hefir hún leyst þau öll af hendi á einn veg, við hinn besta orðstír. Hún dvelur nú erlendis við nám í kgl. leiklistarskólanum, og hefir fengið bestu meðmæli, bæði fyrir ástundun og góða hæfileika. Hún sækir nú um styrk til þess að halda námi sínu áfram, og jeg er í engum vafa um það, að hún á þennan styrk skilið. Jeg geri þó ekki ráð fyrir, að það sje öllum hv. deildarmönnum nægjanlega kunnugt, og býst heldur ekki við, að þeir álíti mig svo dómbæran í þessum efnum, að þeir vegna umsagnar minnar greiði atkv. með þessari till. En ungfrú Önnu veitir annar meiri máttur brautargengi í þessari liðsbón hennar. Hún er dóttir hinnar nýlátnu landsfrægu leikkonu frú Stefaníu Guðmundsdóttur. Nýlega var frú Stefanía til grafar borin. Þá vottaði Alþingi henni virðingu sína með því að fresta þingfundi meðan á jarðarförinni stóð. Með því kvað Alþingi upp sinn dóm um það, hvers virði það var fyrir þessa þjóð að njóta listrænna hæfileika frú Stefaníu Guðmundsdóttur. Nú á Alþingi að staðfesta þann dóm með því að bera fram ósk um; að látin lifi. Það er sagt, að eplið falli sjaldan langt frá eikinni, og það er áreiðanlegt; að ungfrú Anna hefir tekið að erfðum listræna hæfileika móður sinnar, og þess vegna óska jeg eftir því, að hv. deild samþykki þessa till., samþykki hana í einu hljóði, svo að enginn þm. verði til þess að varpa skugga á það lof, sem frú Stefanía Guðmundsdóttir hefir að verðleikum getið sjer með gervallri hinni íslensku þjóð.