01.02.1928
Neðri deild: 11. fundur, 40. löggjafarþing.
Sjá dálk 3250 í B-deild Alþingistíðinda. (3039)
56. mál, bæjarstjórn Ísafjarðar
Jón Auðunn Jónason:
Hv. flm. vildi gera það að litlu atriði, að besta jörðin í hreppnum sje tekin af honum. En ef úr því verður, sem liggur við borð, að Eyrarhreppi verði skift í tvent, þá er þetta mjög mikilvægt atriði fyrir hreppsbúa. Oddvitinn skýrði mjer frá, að sveitarútsvör frá ábúendum þessarar jarðar hefðu síðustu ár verið um 400–500 kr. árlega, og þar sem aðeins 10 býli eru í hreppnum, að Hnífsdal undanskildum, mundi þetta draga mikið úr því, að Skutulsfjörður hjeldi áfram að vera hreppur fyrir sig, þó hreppsbúar æsktu þess. Um Seljaland var öðru máli að gegna. Þetta er smábýli og hreppurinn hafði litlar tekjur af því. Býlið hafði um langan aldur verið notað til beitar af Ísfirðingum og aðeins túnið leigt ábúanda. Kúabúið var reist í Seljalandslandi, og liggur næst að ætla, að ræktað verði Seljalandsland. Land er þar allgott. Jeg treysti ekki samkomulagi um árgjald Ísafjarðar til Eyrarhrepps, en veit vel, að atvmrh. á að skera úr þeim ágreiningi.
Jeg treysti því, að hv. allshn. leiti umsagnar hreppsbúa og sýslunefndar, því að það er venjan, þegar á að taka jarðir af hreppum eða skifta hreppum.