23.03.1929
Efri deild: 30. fundur, 41. löggjafarþing.
Sjá dálk 338 í B-deild Alþingistíðinda. (184)
2. mál, fiskiræktarfélög
Frsm. (Jón Jónsson):
Þetta frv. er hingað komið aftur frá hv. Nd. Þar hefir það tekið nokkrum breyt. og hefir landbn. kynt sjer þær. Breyt. eru þrjár, og er engin þeirra efnisbreyt., en virðast allar eiga að vera til frekari skýringa.
Fyrsta breyt. er við 2. gr. Þar er nýrri setningu skotið inn: „Nú þykir fyrirfram sýnt, að eigandi jarðar muni ekki sækja stofnfund, og skal þá boða leiguliða á fundinn. Má hann taka þátt í umræðum, en ekki atkvæðagreiðslu fyr en hann er úrskurðaður fjelagi í stað landsdrottins“. Þessi viðauki virðist vera til bóta, því hann tryggir eiganda, sem ekki getur sótt stofnfund, rjett til að hafa umboðsmann, leiguliðann, á fundinum.
Þá er bætt aftan við 6. gr. orðunum:
„ enda hafi leiguliði greitt gjald það, sem jafnað er niður samkv. 9. gr. Skal landsdrottinn greiða 10-falda þá upphæð, sem úttektarmenn meta, að árlegt afgjald jarðarinnar megi hækka fyrir aukna veiði“.
Hjer er það nákvæmar tekið fram, að leiguliði skuli hafa goldið til fjelagsins til að eiga rjett á greiðslu fyrir veiðiaukningu. Ennfremur er það beinlínis ákveðið, hve mikil sú greiðsla skuli vera; hún á að vera 10-föld sú upphæð, er árlegt afgjald jarðarinnar má hækka um sakir veiðiaukningar. Þessi viðbót er til engra spjalla á frv., heldur einmitt til að taka það ljósar fram, er í því á að felast.
Loks er síðast breyt., við 10. gr. í henni var svo ákveðið, að „með samþykt verður eigi breytt sjerákvæðum laga um friðun á laxi, nr. 5, 19. febr. 1886“, en Nd. hefir bætt við „og annara laxveiðilaga, er sett kunna að verða“. Virðist þetta ekkert viðsjárverð breyt.
N. leggur því til, að frv. verði samþ. eins og það liggur fyrir nú, og verður það þá væntanlega fyrsta frv., sem afgr. verður sem lög frá þessu Alþ.