05.03.1930
Neðri deild: 44. fundur, 42. löggjafarþing.
Sjá dálk 761 í C-deild Alþingistíðinda. (1373)
136. mál, jarðræktarlög
Magnús Guðmundsson:
Það eru aðeins nokkur orð út af því, sem hv. þm. Mýr. sagði nú í síðustu ræðu sinni í minn garð, um það, hvenær jarðabætur hefðu verið teknar á skýrslu. Ég man ekki eftir neinum ágreiningi milli mín og Búnaðarfél. Íslands um það, hvenær ætti að taka jarðabætur á skýrslu, og vil gjarnan, að hv. þm. sýni mér og sanni, hvenær sá ágreiningur hafi átt sér stað.
Þá vil ég spyrja hann, hvort það hafi verið á þessu ári ákveðið, að það liði lengri tími frá því jarðabætur væru gerðar og þangað til þær væru teknar á skrá. (BÁ: Nei, það er ekki rétt). Þetta er mér þó sagt af kunnugum mönnum. — Annars skal ég athuga þetta nánar, eftir plöggum, sem ég hefi. Mun ég því greiða þessu frv. atkv. til 2. umr., svo að ég fái aðstöðu til að skýra þetta mál, þannig að sannleikurinn komi í ljós. (BÁ: Ágætt).
— Sú breyting, sem gerð var á stjórnarskipun Bf. Ísl. 1923, miðaði m. a. að því að útiloka, að stj. Bf. Ísl. yrði einlit í stjórnmálum eða kosin samkv. pólitísku flokksfylgi eins flokks; með því að láta landbúnaðarnefndir þingsins velja tvo menn í stjórn Bf. Ísl. þótti tryggt, að stj. yrði ekki pólitískt einlit. Ég er ennfremur samþykkur því, sem hæstv. atvmrh. sagði, að bezt sé, að samvinnan geti verið svo náin, sem unnt er, á milli Bf. Ísl. og ríkisstj., eins og gert var ráð fyrir samkv. lögunum 1923.
Máske það sé líka rangt, að jarðræktarstyrkurinn hafi verið lækkaður á síðastl. ári. Hvað segir hv. þm. Mýr. um það? (BÁ: Já, það er alveg rangt). Nú, einmitt það. En ég gæti trúað, að það yrðu ekki margir sammála hv. þm. um það atriði. Annars finnst mér það hart, að hann skuli neita því, að þetta hafi átt sér stað. Þetta vita þó allir. Allir finna og, að það er hart, að jarðræktarstyrkurinn skuli hafa verið lækkaður á sama árinu og kaupgjald hefir almennt hækkað. En ég þykist vita, að hv. þm. Mýr. neiti því eins og öðrum staðreyndum, að kaupgjald verkafólks hafi hækkað á síðastl. ári.