12.04.1930
Efri deild: 76. fundur, 42. löggjafarþing.
Sjá dálk 1378 í B-deild Alþingistíðinda. (1849)
56. mál, siglingalög
Frsm. (Ingvar Pálmason):
Þetta frv. er komið frá hv. Nd. og tók þar engum breyt. frá því, sem það var lagt fyrir þingið.
Í sambandi við þetta frv. er næsta mál á dagskránni, frv. til sjómannalaga, og tel ég ástæðu til að fara nokkrum orðum um þau bæði nú, þegar þetta mál er til umr.
Sjómannalagafrv. er tekið út úr siglingalögunum og er nú gert að sérstökum lögum. Auk þess er það breytt allmikið, en af því leiðir það, að þar sem það er tekið út úr siglingalögunum, þá falla niður allmargar greinar þeirra laga, ef þetta frv. verður samþ. Að öðru leyti eru þær breyt., sem gerðar eru á siglingalögunum með þessu frv., fremur smávægilegar, og hefir n. ekkert við þær að athuga. En þar sem svona stendur á, þá leiðir af því, ef bæði þessi frv. verða samþ., að siglingalögin verða fremur óaðgengileg til notkunar, en eru þó þess eðlis, að þau þurfa að vera aðgengileg, vegna þess að fjöldi manns þarf að nota þau; t. d. er skipstjórum gert að skyldu að hafa nægan fjölda eintaka á hverju skipi, til þess að skipshafnir hafi greiðan aðgang að þeim. Það er nokkuð annað með þau lög, sem ætluð eru dómurum og lögreglustjórum landsins. Af þessu leiðir það, að n. taldi rétt að bera fram brtt. við frv. þetta, þess efnis, að meginmál þessara laga skyldi fellt inn í siglingalögin og þær breyt. á siglingalögunum, sem leiðir af sjómannalögunum, teknar til greina, og lögin þannig gefin út.
Nú kom hæstv. atvmrh. til mín í gær og óskaði þess, að þessi brtt. n. kæmi ekki til atkv. nú við 2. umr., vegna þess að hann taldi, að það gæti komið fyrir, ef breyt. yrði sett inn, að það kynni að verða málinu að strandi, af því að nú er orðið áliðið þings. Ég hefi borið mig saman við annan meðnm. minn um þetta, að verða við tilmælum ráðherrans um það, að láta þessa brtt. ekki koma undir atkv. Hæstv. ráðh. gerði ráð fyrir því, að honum myndi kannske vinnast tími til að rannsaka í Nd., hvort nokkur hætta yrði á því, að frv. yrði ekki samþ. við eina umr., því ef svo yrði; þá vildi hann heldur, að frv. gengi fram eins og það er nú, þótt seinna þyrfti að fella það inn í siglingalögin.
Að öðru leyti hefir n. ekkert við frv. að athuga og leggur til, að það verði samþ., með þeim fyrirvara, að n. geymir sér rétt til að bera fram brtt. við 3. umr.