22.03.1932
Efri deild: 35. fundur, 45. löggjafarþing.
Sjá dálk 1373 í B-deild Alþingistíðinda. (1062)
39. mál, þingsköp Alþingis
Frsm. meiri hl. (Pétur Magnússon):
Hv. 2. þm. Eyf. telur þetta frv. lítilfjörlegt og nauðaómerkilegt. Það er að vísu rétt, að þetta er ekkert stórmál, en ég er þó ekki þeirrar skoðunar eins og hann, að það komi iðnaðarmálunum að engu haldi. Ég held, að yfirleitt muni verða hyllzt til að velja í einstakar nefndir þá þingmenn, sem bera bezt skyn á þann flokk mála, sem vísað er til hverrar n. fyrir sig. Og það er til mestra hagsmuna fyrir atvinnuvegina, að þeir menn fjalli um málefni þeirra, sem hafa bezt vit á þeim. Þetta á við iðnaðarmálin engu síður en landbúnaðarmál, sjávarútveg og fleiri málaflokka, sem vísað er til sérstakra n. í þinginu. Ég hygg, að það gæti orðið að liði fyrir iðnaðarmálin, ef sérstök n. hefði þau til meðferðar, skipuð þeim mönnum, sem bezt skilyrði hafa til þess.
Hv. þm. færði það helzt fram gegn þessu frv., að lítill meirihlutaflokkur í Ed. væri svo störfum hlaðinn og hefði venjulega svo fáum mönnum á að skipa í nefndir, að sömu menn væru í mörgum n. þetta er að vísu rétt. En hann gætir þess ekki, að verkin aukast ekkert þótt nefndunum fjölgi. Þvert á móti ætti það að verða til verkaléttis, að um hvern málaflokk fjalli þeir menn, sem bezt skilyrði hafa til þess.
Hv. þm. vildi halda því fram, að ætíð mundu verða sömu menn í iðnaðarnefnd og allshn., en ekki þarf það að vera. Og hann getur ekki neitað því, að við kosningu manna í allshn. beggja deilda er ekkert tillit tekið til iðnaðarmála. Þær n. eru kosnar með allt annað fyrir augum. Mál þau, sem til þeirra er vísað, eru svo ólík, að ekki er hægt að miða skipun manna í allshn. við hvert þeirra mála.
Ég sé ekki, að þetta frv. miði að neinu leyti til hins verra fyrir afgreiðslu mála, en held fast við, að það geti orðið til hagsbóta fyrir iðnaðarmálin, ef í iðnaðarnefnd væru á hverjum tíma starfandi þeir menn, sem bezt eru til þess kjörnir.