27.05.1933
Neðri deild: 84. fundur, 46. löggjafarþing.
Sjá dálk 147 í C-deild Alþingistíðinda. (3236)
168. mál, viðbótar- tekju- og eignarskattur
Fors.- og fjmrh. (Ásgeir Ásgeirsson):
Ég skal ekki eyða löngu máli í þessa umr. Frv. hefir áður verið rætt af talsverðum hita og með nokkrum upplýsingum. Ég skal ekki efa, að menn séu eins óánægðir með niðurjöfnunarskrána og þetta. Það getur víða óánægjuefni og eins þar, sem flokksmenn hv. 4. þm. Reykv. ráða. Ég get ekki fallizt á að lækka tekju- og eignarskattsviðaukann niður í 40% yfirleitt. Það er að vísu rétt, að ákveðin mun vera 40% hækkun í Danmörku, þótt hærra mundi í upphafi hafa verið fyrirhugað. En þess ber að gæta, að þar situr þingið allt árið, og er þá óvíst, að búið sé að afgreiða þetta endanlega. Eftir því sem ég hefi frétt, þá vantar þar enn tekjur, er nema 86 millj. kr., til þess að geta fullnægt þeim samningum um fjárframlög, sem gerðir hafa verið milli flokka þar. Hygg ég, að þeir telji sér ekki hollt að taka það fé allt að láni og muni því enn standa yfir samningar um frekari tekjuöflun. Er enn ekki víst, hvernig það endar.
Það hefir verið talsvert umtal í bænum um það, að tekjur manna mundu ekki hrökkva fyrir beinum sköttum. Ég skal ekki neita því, að slíkt geti viljað til í einstaka tilfelli. En slíkt getur þá ekki verið tekjuskattinum að kenna, heldur útsvörunum og eignarskattinum. En ég vil benda á, að víða um allt land mun það vera svo, að fæstir borgi útsvör sín af hreinum tekjum nú í þessu árferði. Þetta er eitt af einkennum þessara kreppuára. Og þó er ekki hætt að leggja útsvör á menn fyrir það. Þetta getur ekki verið tekjuskattinum að kenna, sem er eingöngu af tekjum og „progressiv“. Þetta getur hæglega komið fyrir, og það þótt þetta frv. verði strádrepið. Ég óska eftir, að frv. gangi til Ed. Þar hefir Framsókn ekki meiri hl. og verður því að fara um framgang þess þar eftir samkomulagi við aðra.