07.04.1933
Neðri deild: 47. fundur, 46. löggjafarþing.
Sjá dálk 801 í B-deild Alþingistíðinda. (754)
31. mál, tilbúningur og verslun með smjörlíki og fl.
Frsm. (Bjarni Ásgeirsson):
Landbn. hefir athugað þetta frv. og orðið ásátt um að mæla með því, að það verði samþ. með lítilsháttar breyt.
Fyrsta brtt. er við 4. gr., að síðari málsl. gr. orðist svo: „Bannað er, að orðin smjör, mjólk og rjómi eða nokkur orð eða myndir, sem minnt geta á landbúnaðarafurðir, séu notuð í sambandi við vörur þær, sem lög þessi fjalla um, á nokkurn annan hátt en í vöruheitunum sjálfum, svo sem þau eru skilgreind í 1. gr.“ Þetta er aðeins sú breyt., að í viðbót við orðin „Bannað er, að orðin smjör, mjólk og rjómi“ komi þetta: „eða nokkur orð eða myndir, sem minnt geti á landbúnaðarafurðir“.
Það er kunnugt, að mjög er farið að tíðkast að nota myndir í auglýsingaskyni, og það hafa verið settar myndir á umbúðir smjörlíkis, sem minna óþægilega á smjörið sjálft, t. d. myndir af kúm, eins og haft er á rjómabússmjöri, og getur það haft fullt eins mikla þýðingu og orðið sjálft. Þetta er gert til þess að koma í veg fyrir það, að hægt sé að selja smjörlíki undir því yfirskini, að það sé smjör, og sömuleiðis til þess að forða óheilbrigðri samkeppni milli smjörlíkisgerðanna sjálfra, sem geta villt á sér heimildir með þessu.
Þá er brtt. við 6. gr. Eins og stendur í frv., er svo fyrir mælt, að erlent smjörlíki, sem inn flyzt, skuli blandað sama hundraðshluta af smjöri og íslenzkt smjörlíki. En það er ekki fastákveðið, að það skuli blandað íslenzku smjöri. Það er að vísu gefin heimild til þess, að ráðh. mæli svo fyrir, að það skuli blandað með innlendu smjöri. Við vildum taka af allan vafa um þetta og útiloka þann möguleika, að flutt sé inn erlent smjör í smjörlíkinu. Þetta ákvæði um að taka þetta ekki alveg af mun hafa verið sett í Ed. með það fyrir augum að stuðla að því, að innflutningur á erlendu smjörlíki gæti haldið verði á innlendu smjörlíki nokkuð í skefjum.
En líkur eru til þess, ef frv. er samþ. eins og n. leggur til, að erlent smjörlíki verði alls ekki keypt. Þess vegna hefir n. lagt til, að aftan við síðasta málslið 9. gr. komi: „svo og um hámarksverð á smjörlíki, sem blandað er með smjöri“. Þetta er gert til þess, ef svo færi, að óeðlileg verðhækkun ætti sér stað, þá sé atvmrh. heimilt að setja reglugerð um hámarksverð á smjörlíki, sem blandað er með smjöri.
Aðrar brtt. hefir n. ekki gert við frv. og þarf ekki að ræða um málið í heild, því að hv. d. er það fullkomlega ljóst.