13.11.1933
Efri deild: 8. fundur, 47. löggjafarþing.
Sjá dálk 330 í B-deild Alþingistíðinda. (319)
4. mál, samkomudag reglulegs Alþingis árið 1934
Jón Baldvinsson:
Það er alveg rétt hjá hv. 3. þm. Reykv., að hér er aðeins um það að ræða, að ákveða samkomudag Alþingis í eitt skipti á öðrum tíma en venja er til. En hinsvegar hafa menn rætt talsvert um það, hvort ekki kynni að vera heppilegt að breyta þingtímanum til frambúðar. Það er kunnugt, að þing stendur venjulega þangað til afgreiðslu fjárl. er lokið. Stendur oftast nær á afgreiðslu þeirra. Mér sýnist það nú ekki ólíkleg aðferð að halda þingið tvisvar á ári, og byrja þá á fjárl., láta fjvn. koma saman fyrr á haustin og hafa til fjárl. Það er vitanlega miklu auðveldara að semja fjárl. á haustin en fyrr á árinu. Hv. þm. sagði, að það hefði ekki komið að sök hingað til, hvað fjárl. voru samin seint. En ég veit það fyrir víst, að oft hefði verið betur gengið frá þessum l., hefði það verið gert að haustinu. Þegar kemur fram á haustið, má sjá nokkuð glöggt, hvernig fara muni um sölu afurða og afkomu landsmanna. Fyrri hluta árs er aftur á móti verið að afla þeirra afurða, og er þá allt í miklu meiri óvissu. Ég skil ekki, hví hv. þm. kallar mánuðina marz, apríl og maí dauðasta tíma ársins. Mér virðist það vera algert öfugmæli, og mjög undarlegt að þetta skuli koma frá þm. Reykv., því þessir mánuðir, sem hann nefndi, eru reglulegur hjargræðistími Reykjavíkurbúa.
Við þurfum að hafa þann tíma til afgreiðslu þingmála, sem hentugastur er. Með öðrum þjóðum mun það tíðkast, að afgreiðsla fjárl. sé látin fara fram sem næst í lok fjárhagsársins. Sú regla hlýtur að byggjast á því að einhverju leyti, að betra er að sjá fyrir um ástandið í fjármálum þjóðarinnar á þeim tíma. Því væri það höfuðkostur, ef hægt væri að semja fjárl. að haustinu.
Það er rétt hjá hv. þm., að ekki ber að líta á það fyrst og fremst, hvað veldur einstökum þm. erfiðleikum, heldur hitt, hvað heppilegast er fyrir þjóðarheildina.