17.04.1936
Efri deild: 50. fundur, 50. löggjafarþing.
Sjá dálk 672 í B-deild Alþingistíðinda. (988)
6. mál, lax- og silungsveiði
*Frsm. (Páll Hermannsson):
Þau eru upphafleg tildrög þessa máls, að á þinginu í fyrra bar ég ásamt hv. 2. þm. S.-M. fram örlitla breyt. á lax- og silungsveiðalöggjöfinni, sem var aðeins formsatriði, viðvíkjandi því, hvernig fundum skyldi hagað heima í héraði, þar sem veiðifélag er eða fiskiræktarfélag. Ætla ég, að hv. þm. hafi verið því sammála, að sú breyt. væri réttmæt. Þessi upphaflegu tildrög frv. er nú að finna í 10. gr. þess. En utan á þetta hefir svo verið hengt býsna mikið af ýmiskonar stássi, og er það sannast að segja, að töluverður ágreiningur mun vera um það innan þingsins, hvort allt það dinglumdangl muni eiga rétt á sér eða vera til verulegra bóta.
Um laxveiðilöggjöfina hefir alltaf verið ágreiningur. Og ég ætla, að sá ágreiningur muni sérstaklega hafa stafað af mismunandi hagsmunum einstakra manna um landið, sem eiga undir högg að sækja vegna þessarar löggjafar. Munu þeir hagsmunir einnig hafa valdið því, hversu erfitt hefir gengið að ná samkomulagi um þessa löggjöf, þar sem hagsmunir manna hafa viljað farast á mis. Þar má nefna t. d., að illa hefir gengið að ná samkomulagi um reglurnar fyrir því, hvernig skuli skipta hagnaðinum af þessum veiðiskap á milli þeirra, sem búa neðan til, og hinna, sem búa ofan til við veiðiárnar.
Ég held, að ég megi segja, að brtt., sem í frv. þessu felast, gangi yfirleitt í þá átt að skipta þessum hagnaði eitthvað á ný á milli þessara veiðieigenda. Það verður að taka það fram, að þær breyt. á orðaskýringum, sem felast í 1. gr. frv., eru allar gerðar í sambandi við þær veiðiaðferðir, sem notaðar eru ýmist ofar eða neðar við árnar. Það eru náttúrlega breyt. í fleiri áttir í þessu frv., t. d. í 12. gr. þess, þar sem hækkaður er styrkur til þess að reisa klakstöðvar úr 1,50 kr. upp í 2,50 kr. á dagsverk. Þá ætla ég, að megi á það benda, að í 3. mgr. 8. greinar er kannske höfuðatriðið í breyt., þar sem því er slegið föstu, að þar sem fastar veiðivélar eigi að setja, þar skuli lögreglustjóri löggilda lagnirnar. Þær skuli þar af leiðandi vera fastákveðnar af lögreglustjóra.
Ég sé ekki beint ástæðu til þess að fjölyrða nú um þetta frv. En ég vil fyrir hönd landbn. geta þess, að hún er, eins og þingið í heild, engan veginn sammála um þetta frv. Ég get fyrir mitt leyti eftir atvikum fallizt á, að frv. gangi fram, jafnvel þó að vitanlega geti komið fram brtt., sem ég sæi, að væri rétt að samþ. En ég geri mér ekki vonir um það, að nú verði gerðar breyt. á laxveiðil. þannig, að til verulegrar frambúðar verði. Þess vegna geri ég fyrir mitt leyti ekki svo mikið úr því, hvort í smáatriðum kynni að verða breytt ákvæðum frv. eða ekki. Hinsvegar hefi ég í aths. mínum áskilið mér rétt til þess að bera frum brtt. eða vera með brtt., sem fram kynnu að koma. Ég get búizt við því, að brtt. komi við frv. fyrir 3. umr. Mér virðist því eðlilegt, að hv. þd. samþ. frv. eins og það nú er, en þó með það í huga, að gera megi ráð fyrir, að brtt. geti komið fram við það til 3. umr.