04.03.1937
Efri deild: 14. fundur, 51. löggjafarþing.
Sjá dálk 28 í B-deild Alþingistíðinda. (56)
12. mál, skipsstjóraréttindi til handa Pétri Sigurðssyni
Magnús Guðmundsson:
Eins og hv. frsm. tók fram, þá hefi ég skrifað með fyrirvara undir nál., en það er ekki af því, að ég hafi í sjálfu sér neitt við frv. að athuga. Ég hefði getað gengið inn á það í þeirri mynd, sem það kom frá hæstv. ríkisstj., og geri því ekki að neinu kappsmáli, hvort því verði breytt á þann veg, sem n. leggur til, eða ekki. En það er út af aths. við þetta frv., sem ég hefi skrifað undir nál. með fyrirvara. Þar stendur sem sé, að ríkisstj. hafi ráðið þennan mann í þjónustu ríkisins frá 1. jan. 1938 að telja. Ég vildi í þessu sambandi fyrst og fremst spyrja, með hvaða heimild þetta væri gert, og hvaða laun þessi maður ætti að fá. Það stendur, að hann eigi að starfa að sjómælingum. Um það er það að segja, að mér er kunnugt um, að fjvn. hefir undanfarin ár ekki talið fært að veita fé neitt að ráði til sjómælinga umfram laun Friðriks Ólafssonar skipherra, og ástæðan til þess, að fé er veitt til launa handa honum, var sú, að það var litið svo á, að hann væri fastur starfsmaður ríkisins. Nú er mér ekki kunnugt um, að fjárhagur ríkisins sé þeim mun betri nú heldur en að undanförnu, að hægt sé að hafa 2 menn við þetta starf. — Svo er í aths. við frv. nefnd kennsla við stýrimannaskólann í Rvík. Ég hélt ekki, að það væri siður að velja löngu fyrirfram þá menn, sem eiga að kenna þar í tímakennslu. — Svo er hér talað um mælingar og hleðslumerkjaákvörðun skipa. En mér skilst, að það geti varla verið mjög mikið starf fyrir hann. Ég veit, að það þarf að læra þetta og er ekki vandalaust, en mjög mikið starf getur það varla verið. Annars finnst mér það ekki nauðsynlegt vegna þessara starfa að veita þessum manni leyfi til að vera stýrimaður í utan- og innanlandssiglingum. Ég sé ekki, hvað það kemur þessum störfum við, en út í það skal ég ekki fara, því að ég er samþykkur því, að manninum verði veitt þetta skírteini, því að vitanlega hefir hann lært miklu meira en nokkur maður, sem tekið hefir próf við stýrimannaskólann hér.
Ég vildi sem sagt gjarnan fá upplýsingar hjá hæstv. ráðh. um þetta, sem ég hefi nú spurt. Mér finnst, að það hefði ekki legið svo mikið á að ráða þennan mann fastan hjá ríkinu, að ekki hefði verið hægt að bíða eftir samþykki þingsins, og mér skilst, að það hefði verið meiri kurteisi gagnvart þinginu að gera það ekki fyrr en það væri vitað, hvernig þingið tæki í þetta, því að náttúrlega er það ekki svo, að stj. geti ráðið hvaða mann sem henni dettur í hug í þjónustu ríkisins. Þar til þarf að vera heimild, eins og ég veit, að hæstv. ráðh. er kunnugt.