10.11.1939
Neðri deild: 57. fundur, 54. löggjafarþing.
Sjá dálk 284 í C-deild Alþingistíðinda. (3172)
107. mál, útsvör
*Flm. (Sigurður Kristjánsson) ; Ég skal ekki lengja umr. En út af því, sem hv. þm. Barð. sagði, um að þetta væri ekki nein smábreyting. sem frv. fer fram á, þá vil ég segja það, að ég er honum alveg sammála um það. Og ég skil ekki í honum, ef hann hefir skilið mín orð svo, að ég teldi þetta smámál. Það er svo langt frá því, að ég álíti þetta smámál. Ég álít það þvert á móti stórmál. Hv. þm. sagði, að ég væri að læða hér inn stórvægilegum breyt. undir sakleysislegri hulu. Heldur hv. þm., að ég geri ráð fyrir, að hv. þm. séu ekki læsir, svo að þeir geti lesið frv., sem ekkert er óljóst í? Það er tekið fram í frv. á ótvíræðan hátt, hvaða l. séu numin úr gildi með frv., ef að l. verður, en þar eru fyrst talin l. um tekjuskatt og eignarskatt. Ég mótmæli því, að ég hafi viljað láta líta svo út, að þetta væri smámál.
Hv. þm. sagði, að það væri enginn smáræðis tekjustofn, sem ríkissjóður missti samkvæmt frv. Ennfremur sagði hann, að ég hefði talað um tekju- og eignarskattinn eins og bæjar- og sveitarfélögin ættu einhvern einkarétt á honum. Hv. þm. er það sjálfsagt kunnugt, að bæjar- og sveitarfélögin sátu að langmestu leyti að þessum tekjustofni þangað til fyrir 14–15 árum. Það má því með sanni segja, að það sé ekki ég, sem sé upphafsmaðurinn að því, að gera þennan tekjustofn að sértekjum bæjar- og sveitarfélaganna. Enda færði hv. þm. engin rök fyrir því, að þetta væri óheppilegt. Ég færði aftur á móti rök fyrir því, að þessir tveir aðilar væru báðir að „plokka sömu hænuna“.
Hv. þm. kallaði hundraðshlutann, sem gert er ráð fyrir í bráðabirgðaákvæðinu, „náðarbrauð“. Ég hefi ekki minnstu tilhneigingu til að fara út í þennan tón í umr. Ég er að tala um þetta mál í alvöru. Og ég er alveg sannfærður um, að þeir menn, sem eiga að sjá sveitar- og bæjarfélögunum fyrir tekjum, þeir taka þetta mál í alvöru og ætlast til þess, að þm. geri það.
Það getur vel verið, að það megi finna aðrar leiðir en þessa, sem hér er farin, til þess að hjálpa hinum aðþrengdu bæjar- og sveitarfélögum. Það er verkefni Alþ. að athuga það. Og það verður að ætlast til þess, að það sé gert án allrar keskni og alvöruleysis.