13.04.1943
Neðri deild: 101. fundur, 61. löggjafarþing.
Sjá dálk 839 í B-deild Alþingistíðinda. (1064)
140. mál, dýrtíðarráðstafanir
Áki Jakobsson:
Herra forseti. — Vegna þess að ég var aðalflm. þeirrar till. hér í d., sem valdið hefur þessari miklu óánægju hjá sumum mönnum og vonbrigðum, verð ég að skýra afstöðu mína nokkrum orðum. Þegar till. var samþ. hér við 2. umr., treystum við sósíalistar því, að þannig fengi frv. að ganga fram. En þegar brtt. við gr. kom fram við 3. umr., datt okkur ekki annað í hug en brtt. yrði felld, og til þess að taka af tvímælin tók 2. þm. Reykv. (EOl) það fram, að sósíalistar mundu fella gr., ef henni yrði breytt eins og 2. þm. Rang. lagði til. Þá flutti 2. þm. S.-M. brtt., sem gekk í sömu átt, þótt skemmra væri. Þá var enn tekið fram, að við óskuðum, að gr. yrði borin upp eftir samþ. slíkrar breytingar, því að við gætum þá ekki samþ. hana. Þegar Framsfl. var búinn að smella sér inn á brtt. 2. þm. Rang. að nokkru leyti, gat ég ekki skilið það á annan veg en fl. væri að losa sig úr þeirri klemmu, sem samþ. 7. gr. hafði sett hann í. En aðvörun okkar hefðu framsóknarmenn átt að heyra og skilja — og gerðu það víst ekki eða látast ekki hafa skilið. Það er barnalegt af þeim vísu framsóknarmönnum. Þeir létust leggja á það ríka áherzlu, að ákvæði 7. gr. yrðu sett, þótt þau ættu betur heima í skattal., og hví skyldum við ekki taka þá í alvöru? Hitt vissu þeir jafnframt, að ekki kom til mála, að við sættum okkur við frv. í því formi, sem það fékk við 3. umr. Nd. Af hverju stafar þá reiði þeirra við okkur út af breytingum Ed.? Af því að frestað er skattabreytingum? Þessi skattaákvæði, sem hv. 2. þm. S.-M. hefur sennilega samið og taldi á sínum tíma nauðsyn til að bjarga atvinnurekstrinum, eiga nú að vera orðin sá þjóðarvoði, að ekki megi bíða með breyting þeirra eftir því, að róttækar og víðtækar breytingar fáist gerðar á skattal. með nokkrum undirbúningi, eins og Framsfl. og Sósfl. hafa hvor um sig lýst sig alráðna að gera. Nei, Framsfl. þóttu þessi skattal. sannarlega góð, þangað til kjördæmaskipunin breyttist og gerði þau að slæmum l. í hans augum. Nú var framsóknarmönnum sýnd veiði, sem þeir hugðust hafa í hendi sér. Það er alls ekki meiningin að rafvirkja landið með peningum raforkusjóðs, heldur fá þar nokkra viðbót við 25 uppbótarmilljónirnar til þess að kaupa atkvæði fyrir. (Forseti hringir.). Það er alltaf gott að fá háa skatta í ríkissjóðinn, segja menn, en þá viljum við fá að hafa hönd í bagga um það, að féð verði notað í almenningsþágu. Það, sem komið er í ljós af starfi mþn. í raforkumálum, lofar alls ekki góðu. En hitt er gott að heyra frá forvígismönnum Framsfl., að nú skuli ekki standa framvegis á fé, til alþýðutrygginga. Ég skal reyna að sjá til þess, að þeim gefist tækifæri til að sýna viljann í verki.