04.02.1943
Efri deild: 47. fundur, 61. löggjafarþing.
Sjá dálk 1129 í B-deild Alþingistíðinda. (1977)
93. mál, hafnarlög fyrir Húsavík
Frsm. (Gísli Jónsson):
Herra forseti. — Sjútvn. hefur kynnt sér mjög nákvæmlega allt, sem lýtur að þessu máli, og borið frv. saman við gildandi l. Það er nú komið fram, að þar eru enn ónotaðar 200 þús. kr. af styrknum, sem samþ. var til hafnarinnar 1933, og um 300 þús. kr. af lánatryggingum. N. hefur eftir upplýsingum frá vitamálastjórninni komizt að þeirri niðurstöðu, að þetta dugi engan veginn til að ljúka því verki, sem fyrirhugað er á þessum stað og nauðsynlegt er til þess að gera þarna örugga höfn, ekki einasta fyrir heimaflotann, heldur og fyrir væntanlega síldariðju í stórum stíl og fyrir flota, sem þangað mundi sækja annars staðar að, ef örugg höfn væri á Húsavík. N. komst að raun um, að þetta væri ekki nægilegt fé til þessa mannvirkis, ef framkvæma ætti það á þessum tímum. Hins vegar mundi láta nærri, að þetta fé dyggði að mestu leyti, ef hægt væri að vinna þetta verk með sama kostnaði eða sömu vinnulaunum eins og voru 1939. En fyrir því er engin trygging, að í náinni framtíð komist vinnulaunin það niður.
N. er sammála um það, að Húsavík hafi mjög mikil skilyrði til stækkunar. Húsavík hefur ágætt land, hún hefur möguleika til að fá rafmagn, og hún hefur mjög mikla möguleika til þess að fá hita. Það eru því tvímælalaust góð skilyrði til að auka þar útveginn í sambandi við mjög mikið aukna ræktun á Húsavík og nágrenni. N. hefur því orðið sammála um að leggja til, að frv. verði samþ., þó með örlítilli breyt., — þeirri breyt., að við 1. gr. frv. bætist: „enda sé ekki hafizt handa um framkvæmdir nema með leyfi ríkisstj., að fengnum tillögum vitamálastjóra“, vegna þess að þetta er ekki í hafnar l. fyrir Húsavík eins og í mörgum öðrum hafnarl. Og við höfum rætt þetta við hv. flm. frv. og við formann hafnarn., sem báðir mættu á okkar nefndarfundum, og telja þeir, að ekki sé nema eðlilegt að setja þetta ákvæði inn. Allir reikningar þessu máli viðkomandi fyrir síðast liðin 3 ár lágu fyrir n., og hún hafði tækifæri til að fullvissa sig um, að eins og stendur, þá stendur Húsavíkurhöfn undir þeim skuldum, sem á henni hvíla, með þeim tekjum. sem hún hefur nú. Og það, sem sjútvn. þótti mjög gaman að sjá í sambandi við það, var, að tekjur hafnarinnar 1939 voru mun meiri heldur en síðast liðið ár, sem gefur hugmynd um, að höfnin sjálf hafi betri aðstöðu til að standa undir skuldbindingum sínum á venjulegum tímum en á þessum stríðstímum, og gefur því von um öruggari og betri afkomu, þegar tímarnir eru aftur orðnir venjulegir. N. ber því engan kvíðboga fyrir, að hér sé farið út í neinar öfgar um fjárframlög, og vill einróma leggja til, að frv. verði samþ., og þá helzt, að því sé hraðað svo, að það geti orðið að l. á þessu þingi og væntir n. þess, að hæstv. forseti taki það á dagskrá eins fljótt og hægt er, til þess að það fái fljóta afgreiðslu hér í þessari hv. d.