01.03.1943
Efri deild: 66. fundur, 61. löggjafarþing.
Sjá dálk 242 í C-deild Alþingistíðinda. (2825)
120. mál, kynnisferð sveitafólks
Hermann Jónasson:
Herra forseti. — Ég ætla ekki að halda um þetta langa ræðu. Ég vek athygli á því, sem að vísu kom fram í ræðu þess hv. þm., sem nú var að ljúka máli sínu, að við umr. um þetta mál í Nd. var þeirri fyrirspurn beint til hæstv. forseta þeirrar d., hvort hann teldi þetta nýtt mál, eins og því hafði verið breytt við 3. umr., því að ef það teldist nýtt mál, þá átti það ekki að sæta þeirri meðferð, sem það sætti í þeirri d. Forseti Nd. lýsti því yfir, að hann teldi þetta ekki nýtt mál, og því var það afgr. við 3. umr. sem breyt. á því upphaflega frv. Þar af leiðir, að ef svo færi, að úrskurður þessarar d. hnigi í aðra átt, þá getur svo farið, eins og vakin var athygli á, ef ágreiningur verður um mál milli þd., að það verði miklum vafa undirorpið, hvenær mál eiga að fara í Sþ. Um það getur orðið árekstur, sem leiðir til þess, að ekki verði hægt að útkljá mál á þingi. Þess vegna ætla ég ekki að ræða mál þetta frekar. Ég geri ráð fyrir, að þessi atriði séu ekki svo mikið í reyk, að hægt sé að afgr. málið á þann hátt, sem venja er til. Svo er hægt fyrir d. að ræða málið rækilega við þessa umr., og m.a. mætti fresta umr., til þess að hægt væri að gefa hv. þm. tækifæri á að athuga málið svo ýtarlega sem þeir kjósa. Ef d. óskar eftir þessari afgreiðslu málsins, þá getur það fengið fullkomna afgreiðslu hér alveg eins og þótt það gengi gegnum þrjár umr. D. mun skera úr, hvaða aðferð verður um þetta höfð, og ég hygg, að það fari mjög eftir því, hversu velviljaðir menn eru þessu máli. Það getur verið, að eyða megi málinu með þessari aðferð, og er sennilegt, að það verði niðurstaðan. Hins vegar álít ég, að mál, sem hefur verið gerbreytt, hafi oft fengið að ganga fram þrátt fyrir það, einkum á síðari árum, og það fer mjög mikið eftir því, hvort menn vilja eyða málinu, hvaða afgreiðslu frv. verður valin. Læt ég svo útrætt um það mál.