19.10.1943
Sameinað þing: 21. fundur, 62. löggjafarþing.
Sjá dálk 411 í D-deild Alþingistíðinda. (3604)
98. mál, neyzlumjólkurskortur
Flm. (Emil Jónsson):
Ég vil bara segja það við hv. þm. Barð., að ræða hans er byggð á misskilningi. Um þetta hef ég það að segja, að þegar ég vitnaði til þess, að form. Framsfl., hv. þm. S.Þ., sagði og lesið var hér upp úr blaðinu, var eingöngu miðað við útfluttar landbúnaðarafurðir. Hér er aftur á móti verið að tala um verð, sem bændur eiga að fá á innlendum markaði og l. eru fyrir, en hins vegar er ekki hægt að tryggja bændum annað verð fyrir afurðir sínar á erlendum markaði en það, sem er markaðsverð. Það, sem ég sagði því um daginn, var um útlenda markaðinn, en um innlenda markaðinn gilda l. Ég skal þó viðurkenna, að samkomulag mun vera um að fá þeim breytt að mjög verulegu leyti. Og ef það verður niðurstaðan hjá Alþ., að það afgreiði grundvöll landbúnaðarvísitölunnar þannig, að tryggja skuli bændum þetta verð á afurðum sínum allt árið um kring, verður að tryggja öllum verkamönnum landsins ákveðið tímakaup fyrir allt árið.
Ég skal ekki vera margorður út af ræðu hv. þm. V.-Sk. Hann notar hér þá aðferð, sem hann er vanur að nota, þegar hann getur ekki fært rök fyrir sínu máli, nefnilega að minnast ekki á kjarna málsins, sem liggur fyrir. Hann gerði sér að umræðuefni Mjólkurbú Hafnarfjarðar og talaði um það í þeim tón eins og það væri mér einum skylt. Síðan upplýsti hann, hversu margar þúsundir þetta mjólkurbú hefði fengið í styrk. Um þetta atriði er mér ekki kunnugt, en eitt vil ég gjarna segja hv. þm., að Mjólkurbú Hafnarfjarðar óskar einskis frekar en vera laust við mjólkurskipulagið. Einnig ber það ekki vott um gott skipulag, ef um svo háar styrkveitingar er að ræða. Álít ég hér með nægilega svarað þessum fullyrðingum í ræðu hv. þm. V.-Sk. Hvað við víkur ummælum hans um það, að Hafnfirðingar hafi verið svo áfjáðir í að selja vinnu sína til hins erlenda setuliðs, að þeir hafi að heita má lagt niður mjólkurframleiðslu sína, þá vil ég upplýsa það, að því miður hefur farið svo, síðan l. um þetta mjólkurskipulag komu í gildi, að mjólkurframleiðslan í Reykjavík og Hafnarfirði hefur nálega staðið í stað, eða frá árinu 1934. Hins vegar er mér einnig kunnugt um, að í Árnes-., Rangárvalla-, Mýra- og Borgarfjarðarsýslum hefur framleiðslan aukizt mjög mikið eða allt að 30%. Þetta sýnir glögglega, hverjir hafa hagnazt af þessu skipulagi, en það eru einmitt ofangreindar sýslur. Hinir, sem búa næst Reykjavík og Hafnarfirði, eru þeir, sem beðið hafa tjón af skipulaginu. Þetta er því ástæðan fyrir því, að þessi atvinnuvegur hefur dregizt saman eða staðið í stað í Reykjavík og Hafnarfirði, samtímis sem hann hefur aukizt annars staðar.
Þegar hv. þm. sagði, að ég hefði beitt hér mjög heimskulegum málflutningi, þá vil ég vísa þeim fullyrðingum heim til föðurhúsanna, því að allt, sem ég hef sagt, get ég staðið við, hvar og hvenær sem er, og fyndist mér nær, að hann athugaði sinn eigin málflutning.
Hv. þm. V.-Sk. býður mér að athuga þær tölur, sem hann hefur hér farið með, og tek ég því boði þakksamlega. Ég vil gjarnan taka þátt í að endurskoða allt þetta skipulag frá rótum, fara gegnum bækur og gögn og mundi þá ekki telja eftir mér að skoða allt, sem ég vildi skoða, og rannsaka, hvernig í þessum málum liggur frá byrjun. Það er áreiðanlega eitthvað í þessu skipulagi, sem er öðruvísi en það á að vera, hvar og hvernig sem það er geymt. Þrátt fyrir allar upplýsingar hv. þm. V.-Sk. er það staðreynd, að mjólkurskortur er hér verulegur og fólkið fær minni mjólk en það hefur fengið. Um þetta get ég dæmt af persónulegri reynslu og eins af viðtali við fjölda fólks. Þessi hv. þm. líkir okkur, sem áfellumst þetta skipulag, við A1 Capone, sem er einn hinna alræmdustu glæpamanna, sem sagan getur um. Mér finnst þetta eins og fleira hjá þessum hv. þm. mjög heimskulegt.
Ég mun svo ekki tefja umr., vegna þess að ég óska þess, að málinu verði flýtt, svo að árangur náist sem fyrst. Tilgangur minn með þessari till. er ekki sá að standa í deilum við hv. þm. V.-Sk., heldur eingöngu til þess að ráða bót á ástandi, sem er óviðunandi. Vænti ég því, að hv. þm. setji ekki fótinn fyrir, að þetta verði gert, í fyrsta lagi með því að bæta úr brýnustu þörfinni nú og tryggja, að meiri mjólk fáist til bæjarins en verið hefur, enn fremur að taka allt þetta skipulag til endurskoðunar og rækilegrar rannsóknar.