13.12.1944
Neðri deild: 91. fundur, 63. löggjafarþing.
Sjá dálk 171 í C-deild Alþingistíðinda. (2757)
129. mál, jarðræktarlög
Bjarni Ásgeirsson:
Ég vil aðeins árétta tvennt, sem kom f ram í ræðu hv. f rsm., að þessi umreikningur, sem hæstv. landbrh. var með um kostnað af þessum framkvæmdum, er sennilega í hærra lagi, en það er ekki helmingur þess kostnaðar, sem leiðir af þessu frv. Fyrst og fremst er helmingurinn hækkun á styrk, þannig að sá helmingur kæmi alltaf fram, ef þessar framkvæmdir væru unnar á sama tíma. Auk þess er þess að geta, að nú er í gildi bráðabirgðaákvæði um 100% hækkun á allar sléttur gömlu túnanna, og það dregst frá heildarupphæðinni líka. Ef maður fer að bera saman, hvað leiðir af þessu frv. og því, sem er í núgildandi l., þá verður það ekki svo lítill hluti af þessari nýrækt, sem tilheyrir núgildandi l. Auk þess verð ég nú að halda því fram, þó að ég hins vegar geti ekki sannað það, að eftir að ég hef farið gegnum reikning Pálma Einarssonar, þá held ég, að hann fari það fyllsta um kostnaðaráætlunina. Hann gerir ekki ráð fyrir, að neitt að þessu nýja landi verði fengið með sléttun engjalands, eins og hlýtur að verða á stóru svæði, og það er ekki nema brot af þeim kostnaði, sem kostar að fá jafnstórt land í nýrækt með fullkominni framræslu, þannig að ég er alls ekki hræddur um, að kostnaðurinn verði eins gífurlegur og hæstv. landbrh. áleit.
Annað vil ég einnig undirstrika hjá honum, að jafnvel hvað mikil vinna sem lögð er í þetta, væri ekki hægt að gera ábyggilega kostnaðaráætlun. Það er svo margt, sem grípur þar inn í og enginn getur séð fyrir. Hvað mörgum árum sem væri varið til að reikna slíkt út, þá lægju aldrei fyrir það áreiðanlegar upplýsingar, að það gæti ekki valdið okkur miklu meira tjóni að bíða en gagnið yrði, sem af því fengist. Þess vegna er það, að þótt ekki liggi fyrir tæmandi upplýsingar, þá getur það ekki réttlætt bið á málínu.
Að hinu leytinu hef ég ekki sannfærzt af þessari ræðu hv, þm. A.-Húnv. og umr. í n. um það, að það geti haft nokkur veruleg áhrif á bætt vinnubrögð eða bætta framkvæmd þessa verks, þó að ríkið kosti ákveðinn hluta þess í stað þess að veittur sé styrkur, því að samkvæmt hans till. eru það sömu aðilarnir, sem sjá um verkið, sömu menn sjá um það hjá þeim, sem fá aðeins jarðræktarstyrk, og þar, sem ríkið kostar framkvæmdina. En hvað um það, um það skal ég ekki deila.
Ég þakka hv. þm. og hæstv. ráðh. fyrir þær upplýsingar, sem hann gaf um málið. Hv. frsm. heldur fast við sínar till., og það kom fram hjá hæstv. ráðh., að hann hefur meiri trú á þeim, og þó að ég hafi það ekki, þá vil ég ekki hætta málinu í tvísýnu með mínum till., og mun ég því ekki leggjast á móti till. meiri hl., þar sem þær hafa það mikið fylgi, að málið kæmist ef til vill gegnum þingið, ef þær yrðu samþ., þar sem ég tel meiri tvísýnu með mínar till., því að ég geri ekki það mikinn mun á till., að ég vilji stofna málinu í tvísýnu með þeim.