02.03.1945
Efri deild: 140. fundur, 63. löggjafarþing.
Sjá dálk 348 í C-deild Alþingistíðinda. (3180)
140. mál, tekjuskattur og eignarskattur
Magnús Jónsson:
Þetta frv. hefur legið alllengi í salti, og stafar það af því, að verið var að undirbúa brtt. við það. Hef ég nú borið fram tvær, en mér er ekki fullkunnugt um, hvort fleiri koma fram.
Um þær brtt., sem ég hef flutt á þskj. 1247, er það að segja, að hvorug þeirra er neitt stórvægileg í sjálfu sér. Skal ég þá fyrst minnast á 2. brtt., af því að hún er við sjálfa frvgr. og er um það, að sú heimild, sem þar er veitt aðeins fyrir 1944 til þess að breyta tímaákvæði því, sem um er að ræða í 4. kafla tekju- og eignarskattsl. frá 1935, verði gerð almenn. Hygg ég, að sú heimild geti varla orkað tvímælis, og er því rétt, að hún sé í skattalögunum.
Hin brtt. er um það, að á undan 1. gr. komi ný gr., og breytist greinatalan samkv. því. Er hún á þá leið, að á eftir 23. gr. komi ný málsgr. um þátttöku bæjarfélaga í kostnaði af skattstofu, þar sem sérstakur skattstjóri er skipaður. Það virðist vera eðlilegt, að sá kostnaður skiptist milli ríkis og bæjar, því að bæjarfélögin njóta starfs skattstjóra og þeirrar skrifstofu, sem þar er. Í brtt. er lagt til, að í Reykjavík greiðist kostnaðurinn að 1/3, en utan Reykjavíkur að 1/4, af því að það virðist ekki rétt, að sama hlutfall gildi í Reykjavík og annars staðar, af því að Reykjavík notar meira starf skattstjórans en annars staðar er gert, enda er starf skattstjóra þar nokkru víðtækara en fyrir bæjarfélagið.
Ég legg svo þessar brtt. fram til atkv. Ég skal taka fram, þótt ég væri ekki frsm. á sínum tíma, að 2. brtt. mætti vera frá n., því að hún mun mæla með henni, þó að hún hafi enga ákvörðun tekið um það.