12.03.1946
Efri deild: 82. fundur, 64. löggjafarþing.
Sjá dálk 569 í B-deild Alþingistíðinda. (514)
5. mál, verðlagning landbúnaðarafurða o.fl. (heildarlög)
Jónas Jónsson:
Það hafa komið hér fram skýringar á því, af hverju dýrtíðin stafaði og hvenær hún hafi byrjað. Ég lít svo á, að stíflan hafi brotnað strax í styrjaldarbyrjun, þegar kaup sjómanna var hækkað. Þá hófst það kapphlaup, sem síðan hefur haldið áfram þangað, sem nú er komið. Með þessu er ég ekki að segja, að þessi yfirsjón afsaki allar þær vitleysur, sem síðan hafa verið gerðar í dýrtíðarmálunum. En þótt ég sé sammála framsóknarmönnunum hér í deildinni um það, að bændur hafi verið illa leiknir og óréttilega, þá get ég ekki hælt þeirri aðferð, sem Búnaðarfélag Íslands hefur tekið upp. Forustumenn þess hafa gert sig seka um þá stórkostlegu villu að ætla sér að stofna verkalýðsfélag án þess að kunna það.
Ég get getið þess nú á 30 ára afmæli Alþýðusambands Íslands, að ég átti nokkurn hlut að stofnun þess félagsskapar. Grundvallaratriði slíks félagsskapar er það, að menn stofna félagið sjálfir, borga gjöld til þess sjálfir og gera sjálfir það, sem gera þarf. En það, sem forustumenn bændasamtakanna flöskuðu á, var það, að þeir ætluðu að láta löggjafann skaffa sér fé til sinna þarfa. Það er ekki þannig, sem Sigurður Guðnason fer að, þegar hann hyggur á stórræði. Það er hollt fyrir formann Framsfl. að vita þessa hluti, svo að hann geri betur næst, þegar hann ætlar að stofna verkalýðsfélag.