09.04.1947
Efri deild: 109. fundur, 66. löggjafarþing.
Sjá dálk 1946 í B-deild Alþingistíðinda. (3611)
148. mál, vatnsveitur
Steingrímur Aðalsteinsson:
Herra forseti. Ég vakti máls á því við 2. umr. þessa máls, að ég teldi það til bóta, að hlutum úr hreppum væru opnir möguleikar til að njóta þeirra hlunninda, sem l. þessi gera ráð fyrir, við að koma upp hjá sér vatnsveitu. Ég benti þá á ákveðið þorp, þar sem komin er upp vatnsveita fyrir samtök þorpsbúa, án þess að sveitarfélagið sem heild standi að henni. Hv. frsm., þm. Barð., gaf þá yfirlýsingu, að hlutar úr sveitarfélögum, og þar á meðal þetta þorp, kæmu undir þessi l. og nýtu hlunninda samkv. þeim, án þess að þeim sé breytt. Ég dreg mjög í efa, að þessi skýring sé rétt, og ber því fram brtt. á þskj. 593 varðandi þetta atriði. Í frv., eins og það liggur fyrir, fæ ég ekki betur séð en að það sé skilyrði til að njóta þeirra hlunninda, sem um er að ræða, að sveitarfélagið eigi vatnsveituna, sem um er að ræða, og það sé sá eini lántakandi, sem til greina geti komið. Í þessu sambandi veit ég a. m. k. um þetta eina dæmi, þar sem sveitarfélagið á ekki vatnsveituna, heldur hafa þorpsbúarnir, sem í þessu sambandi hafa sérhagsmuna að gæta umfram aðra íbúa sveitarinnar, stofnað með sér félag, og ég býst við, að það verði að breyta frv. frá því, sem nú er, til þess að þetta félag yrði hinn lögformlegi aðili. En einnig gagnvart fjárhagsatriðunum verður það form heppilegra, að þorpsbúar myndi félag, sem verði aðilinn að láninu með ábyrgð viðkomandi sveitarfélags að baki. Ég held, að það yrði vænlegra til framkvæmda og auðveldara að fá ábyrgð, ef gengið er frá þessu eins og gert er ráð fyrir í brtt. minni, að ríkisstj. sé heimilt að láta ákvæði l. einnig ná til vatnsveitufélaga, sem hafa eftir 1942 gert eða gera vatnsveitur fyrir hluta úr sveitarfélagi, án þess að sveitarfélagið sé eigandi veitunnar, ef viðkomandi sveitarstjórn mælir með því og veitir ábyrgð fyrir láni ríkissjóðs til vatnsveitufélagsins, því að mér skilst, að þetta sé vænlegra til framkvæmda en ef það er fastbundið við sveitarfélagið. Ég veit ekki, hvort hv. félmn. hefur rætt þessa till., síðan hún kom fram fyrir páskaleyfi, en ég vildi mælast til þess, að hv. þdm. leggi þetta mál niður fyrir sér og athugi, hvort ekki er heppilegra, að slík heimild sé fyrir hendi, a. m. k. gagnvart þeim stöðum, þar sem þegar hefur verið ráðizt í framkvæmdir, og ég vænti þess, að þeir sjái, að þetta form, sem felst í brtt. minni, er öllu heppilegra. Ég skal ekki segja, hvort ástæða er til að fresta umr. eða hvort n. telur ástæðu til að athuga till., en væntanlega segir hv. frsm. til um það.