18.12.1948
Neðri deild: 45. fundur, 68. löggjafarþing.
Sjá dálk 193 í B-deild Alþingistíðinda. (328)
107. mál, dýrtíðarráðstafanir vegna atvinnuveganna
Sigfús Sigurhjartarson:
Ég mun ekki lengja umr. að óþörfu. Hv. 3. þm. Reykv. lét þess getið, að við sósíalistar værum að „kókettera“ við samvinnustefnuna. Við erum alls ekki að „kókettera“ við hana og erum ekki einu sinni í tilhugalífi, heldur erum við kvæntir henni. Það er sem sé svo, að það er ekki hægt að vera sósíalisti án þess að vera samvinnumaður. Ég hef alla tíð síðan ég átti þess kost verið starfandi meðlimur í kaupfélagi og reynt að rétta samvinnuhreyfingunni hjálparhönd eftir getu. Svo fór þessi hv. þm. að tala um, að það væri ljótt að draga viðskiptamál inn í þessa skítugu pólitík. Til hvers kom þessi hv. þm. inn í þessa skítugu pólitík? Það væri þó ekki til þess að ræða um viðskipta- og verzlunarmál, og satt að segja þá held ég, að hann viti það, að það er svo högum háttað í okkar landi, að meginþátturinn og einn sterkasti þátturinn í okkar pólitík eru einmitt verzlunarmál og viðskiptamál. Og það er ekki bara hér, heldur alls staðar annars staðar, að pólitík og verzlun og viðskipti verður ekki aðskilið. Það er bara misskilningur hjá þessum hv. þm., að vondir menn séu að draga þessi mál inn í skítuga pólitík. Hv.þm.var hneykslaður yfir því, að ég væri með dylgjur. Ég bað um dæmi, og það kom. Ég nefndi gjaldeyrisleyfi. Hvaðan kemur þessi hv. þm.? Veit hann ekki, að nokkrir menn eru staðnir að því fyrir dómstólunum hér, að þeir hafa farið ólöglega með gjaldeyri, komið gjaldeyri undan úr landinu? Veit hann ekki, að þeir eru fleiri, sem hafa gert það og ekki hefur komizt upp um? Hvers vegna má ekki segja frá þessari staðreynd, og hvers vegna hrekkur hv. 3. þm. Reykv. við, þegar á hana er minnzt? Þessi hv. þm. var að tala um, að menn ættu að halda sér við málið, sem til umræðu væri. Hitt er og staðreynd, að hv. þm. hélt nú langa ræðu og minntist aldrei á málið, sem fyrir liggur.
Þá vildi ég segja nokkur orð út af því, sem hv. þm. V-Húnv. sagði um Eimskipafélag Íslands. Ég skal segja það alveg ákveðið, að ég harma það, að Sósfl. skyldi ekki vera búinn að taka ákvörðun um að koma fram sem einn maður, og þess vegna var það svo, að 2 menn úr flokknum greiddu atkv. úr allt annarri átt. Það getum við gert upp okkar á milli. Hvenær varð þetta flokksmál Framsfl.? Hvað oft er þessi hv. þm. búinn að greiða atkv. með skattfrelsi Eimskipafélagsins? Ég vænti þess, að hann gefi skýrar upplýsingar um, hvenær þetta varð að flokksmáli hjá Framsfl. Ég vildi segja hv. þm. að rifja það upp, áður en hann fer að áfellast okkur sósíalista fyrir það, þó að við í þetta sinn ekki hefðum gert neina samþykkt um það, hvernig þm. okkar greiddu atkv. í málinu.
Svo eru það örfá orð út af ræðum hæstv. fjmrh., hæstv. menntmrh. og hv. þm. V-Húnv. Hæstv. fjmrh. upplýsti, að hv. þm. V-Húnv. hefði verið sérstakur trúnaðarmaður ríkisstj. við að undirbúa þetta frv. Hæstv. menntmrh. sagði, að hv. þm. V-Húnv. hefði tekið þátt í að athuga ýmsar leiðir. Svo les hann upp, að ágreiningur hafi verið um leiðirnar, t.d. um það, hvort leggja ætti sérstakan skatt á heimilistæki og jeppa. Það virðist vera eini ágreiningurinn, sem Framsfl. hefur gert. Hvað skeður svo? Það skeður, að það er lagt til að leggja sérstakan skatt á heimilistæki og jeppa. Eina áhugamál Framsfl., sem ráðherra hefur bent á í sambandi við þetta mál, var virt að vettugi. Hv. þm. V-Húnv. segir hins vegar: „Ég hef engar till. gert, það fór engin atkvgr. fram.“ Hæstv. menntmrh. segir, að hlutverk hv. þm. V-Húnv. hafi verið „að rúlla upp möguleikum.“ Hann var að rúlla upp möguleikum til þess að leggja skatta á t.d. heimilistæki og jeppa, og ríkisstj. lét leggja skatta á hvort tveggja. Það er erfitt að skilja, hver segir satt og hver hallar réttu máli. En eitt er þó víst, að það hefur verið upplýst hér, að það ætti að flytja inn bíla fyrir allt að 8 millj. kr. Hæstv. forsrh. byrjaði sína ræðu með því að segja frá því. Svo kemur hæstv. menntmrh. og segir, að það hafi engin áætlun verið gerð um það, enginn viti, hvað verði flutt inn af hverju. Eins verður þó gætt að lokum. Það verður ekki svikizt um að koma þessum byrðum yfir á þjóðina á einn eða annan hátt. Það er eina skýlausa loforðið, sem Framsfl. hefur gefið við þessar umr. Hæstv. menntmrh. endurtók eitt uppáhaldsorð sitt nokkrum sinnum í ræðu sinni. Hann sagði: „Ég vil ekki vera að þessu fjasi.“ Þetta þýðir sama og að segja: „Ég hef engin rök, og ég hef ekkert að segja.“ Það er líkamála sannast, að hér er um rökþrot hjá þessum mönnum að ræða. Hver af öðrum segja þeir: „Ekki er þetta mér að kenna.“ Hv. þm. V-Húnv. var að rúlla upp möguleikum, og stj. valdi úr því, sem rúllað var upp. Ég held, að hæstv. menntmrh. verði að fara að athuga vel, að hann má ekki mikið lengur halda svo á málunum eins og hann hefur gert upp á síðkastið, til þess að það verði ekki fleiri sem „rúlla“ en hv. þm. V-Húnv. Það gæti farið svo, að þjóðin rúllaði honum og hans flokki.