10.05.1949
Neðri deild: 105. fundur, 68. löggjafarþing.
Sjá dálk 400 í C-deild Alþingistíðinda. (3822)
138. mál, eftirlit með rekstri ríkisins og ríkisstofnana
Fjmrh. (Jóhann Jósefsson):
Út af fyrirspurn hv. þm. um það, hvað skoða beri ríkisstofnanir, þá yrði allt of löng upptalning að greina frá því, enda er gert ráð fyrir í 8. gr., að fjmrn. geti með reglugerð kveðið nánar á um starfssvið þessa manns og önnur atriði, og þar kæmi þetta inn undir. Annars vita flestir, hvað átt er við, þegar um ríkisstofnun er rætt. En ég tel þó fullan vafa á því, hvort bankarnir teldu sig heyra undir svona eftirlit, því að þeir hafa fastara system, en margar aðrar stofnanir ríkisins. Þó skal ég ekkert aftaka í því efni, en skilst hér vera um reglugerðarákvæði að ræða.
Um hitt atriðið, sem hv. þm. spurði, þá sker d. vitanlega úr um það, hvort hún vill fella inn í frv. það ákvæði að sameina ríkisstofnanir. En ég sé ekki, að þó að sú heimild væri samþ. út af fyrir sig, þyrfti að tengja hana þannig við efni þessa frv., að ekki mætti aðhafast neitt annað til úrbóta, fyrr en slíkt væri framkvæmt.
En um ræðu hv. þm. almennt veit ég, að ýmsar hans ábendingar hafa við rök að styðjast. Samstarf um sparnað hjá þessari ríkisstj. og fyrri ríkisstj. hefur aldrei verið nægilega mikið. Og vald þess manns, sem er talinn bera ábyrgð á fjármálunum, hefur ávallt verið of lítið í okkar þjóðfélagi. Og eftir því sem tölurnar verða stærri, sem fengizt er við, útgjöldin meiri, fyrirtækin fleiri, þá fer vald fjmrh. minnkandi, en vex ekki eins og nú horfir við. En um aths. hv. þm. vil ég enn fremur segja, að mig undrar ekki, þó að þær séu með stjórnarandstöðusjónarmiði og tón. Því er eðlilegt, að hann segi, að ef þetta eða hitt sé ekki hægt, þá þýði ekki neitt að eiga við þetta. Það er ekki annað en það, sem búast má við frá hans hálfu. Honum er af alveg eðlilegum ástæðum ekki sérstakur áhugi á því, að neinum umbótum verði náð fram undir forustu núverandi stj. Ég get ekkert láð honum það.