05.01.1950
Neðri deild: 22. fundur, 69. löggjafarþing.
Sjá dálk 83 í B-deild Alþingistíðinda. (279)
81. mál, ríkisábyrgð á útflutningsvörum bátaútvegsins o.fl.
Eysteinn Jónsson:
Herra forseti. Það eru aðeins nokkur orð í sambandi við aths. hæstv. ráðh. — Hann taldi engan skaða skeðan, þó að þetta frv. kæmi ekki fram fyrr en í dag, því að vertið væri ekki hafin hvort sem væri, og auk þess hefði ekkert fiskazt þessa fyrstu daga í janúar. Þetta tel ég ekki rétt hjá hæstv. ráðh. og hef það fyrir satt, að vertíð byrji um áramót. Hitt er rétt, að vegna seinagangs og óánægju í sambandi við þessi mál undanfarið hefur lítið orðið úr veiði í janúar. En það á ekki að vera til eftirbreytni, heldur til viðvörunar. Það kastarlíka tólfunum nú, því að oftast hafa einhverjar ráðstafanir verið gerðar fyrir áramót, en nú er kominn 5. jan., þegar frv. um þetta efni er lagt fram, og sjá allir, að það hlýtur að taka nokkra daga að afgreiða það í Alþingi, enda þótt það verði kannske samþykkt, og hljóta því allir að sjá, að í hreint óefni er komið, og er það fyrst og fremst sleifarlagi ríkisstj. að kenna. Hæstv. ráðh. viðurkenndi að vísu, að nauðsyn væri að hraða málinu, og beindi því til mín sérstaklega. Ég vil benda hæstv. ráðh. á, að ég hef ekki tafið þetta mál með óeðlilega löngum ræðum. Hins vegar hefur hann sjálfur verið mjög langorður og talað mörgum sinnum lengri tíma en ég. Það er því sízt hans að ásaka mig fyrir að tefja málið. Annars ætla ég ekki að fara frekar út í það atriði.
Hæstv. ráðh. minntist á, að ég væri að telja eftir þau fríðindi, sem útgerðarmenn hefðu fengið í sambandi við frjálsan gjaldeyri. Þetta er alls ekki rétt. Það er fjarri lagi, að ég hafi talið það eftir. Hitt tók ég fram, að rétt væri að upplýsa, hvaða vörur það væru, sem útgerðarmönnum væri heimilt að leggja á, í sambandi við þennan frjálsa gjaldeyri. Ég vil benda ráðh. á, að þetta tók ég fram vegna þess, að útgerðarmenn hafa kvartað undan því við mig, að það væri sífellt nudd um það, að óeðlileg viðskipti færu fram í sambandi við þennan gjaldeyri. Til þess að koma í veg fyrir þennan áróður tel ég heppilegt að gefa nákvæma skýrslu yfir þessar vörur og greina þar rækilega á milli flokka, svo að ekki gæti verið um nein óhrein viðskipti að ræða. Þá hefðu útgerðarmenn hreinan skjöld, og aðrir gætu ekki notað þessi hlunnindi útgerðarmanna sem skálkaskjól fyrir svartamarkaðsbraski og gjaldeyrissvindli.
Þá sagði hæstv. ráðh., að afstaða mín til þessa máls væri í ósamræmi við afstöðu mína í fyrra, því að þá hefði ég fylgt sams konar máli. Ég vil í því sambandi benda hæstv. ráðh. á, að það er dálítið annað að sætta sig við 6% söluskatt eða 30%, eins og þetta frv. gerir ráð fyrir, og þar af leiðandi er þetta frv. algerlega ósamanberandi við dýrtíðarfrv. í fyrra.
Ég man ekki eftir fleiru, sem ég tel sérstaklega þörf á að ræða í sambandi við það, sem fram kom hjá hæstv. ráðh., og skal því láta staðar numið.