12.11.1951
Efri deild: 27. fundur, 71. löggjafarþing.
Sjá dálk 838 í B-deild Alþingistíðinda. (1244)
50. mál, sauðfjársjúkdómar
Landbrh. (Hermann Jónasson):
Herra forseti. Það er nú aðallega eitt atriði af því, sem hefur verið rætt hér, sem mig langaði að gera að umtalsefni, og það er það, hvort átt hefði að vera búið að tvöfalda girðinguna frá Bitrufirði vestur í Gilsfjörð og gera að nýju girðinguna frá Steingrímsfirði suður í Berufjörð. — Nú, ég sagði áðan, að ég efaðist um, að þetta hefði verið hægt, eftir að veikinnar varð vart, og dreg ég það í efa. Um þetta atriði ætla ég ekki að ræða frekar, og geta aðrir dæmt um það en við hv. 6. landsk. tveir, hvort líklegt sé, að hægt sé að gera við girðingu uppi á háfjöllum eftir að þessi tími er kominn. Annars, ef hv. þm. fylgist með máli þessu, sem hann ætti að gera sem þm., þá ætti hann að vita, að girðingin var tvöfölduð s.l. sumar. Svo ætti hv. þm. að vita það, sem hver sauður á Vestfjörðum veit, að girðingin kemur ekki að neinu haldi yfir veturinn, og er hún öll á kafi og hægt að fara yfir hana á skíðum án þess að verða var við hana. Því finnst mér æsing hans harla undarleg. Í vor á að gera við girðinguna, og verði það ekki búið á tilsettum tíma, þá fyrst getur hann farið að krítisera. Það er ekki 1, ekki 10, heldur 100 staðir á Vestfjörðum, þar sem hvergi verður vart við girðinguna yfir veturinn. Kann ég heldur illa við umr. af þessu tagi. Ég hef sjálfur farið yfir girðinguna í Kollafirði á skíðum án þess að verða var við hana á stórum kafla, og skiptir þá litlu máli, hvort viðgerð biði til vors. Hins vegar er það fullvíst, að eftir allt það jarðrask, sem verður yfir veturinn, verður að gera við girðinguna á hverju vori, þar sem vegir grafast í sundur vegna jarðrasks, og þetta veit ég að hv. þm. veit fullvel.