04.12.1951
Efri deild: 37. fundur, 71. löggjafarþing.
Sjá dálk 1058 í B-deild Alþingistíðinda. (1790)
97. mál, skógræktardagur skólafólks
Frsm. (Vilhjálmur Hjálmarsson):
Herra forseti. Þetta mál hefur ekki áður legið fyrir hv. Alþ. Hins vegar minnist ég skrifa Skúla Þorsteinssonar á Eskifirði um þetta mál eða hliðstæða hugmynd. Og eins og fram kemur í bréfi fræðslumálastjórnarinnar, sem prentað er sem fskj. með nál., þá hafa þegar einstöku skólar tekið upp þennan hátt.
Landbn. hefur haldið fund um þetta mál og sent frv. til umsagnar, eins og nál. ber með sér. N. telur, að með þessu frv., ef að lögum yrði, væri stigið verulegt spor í þá átt að örva þessa starfsemi. N. lítur svo á, að með frv. sé mjög hófsamlega í sakirnar farið. Hér er aðeins um heimild að ræða. Það er sem sagt gert ráð fyrir, að málið fái að þróast áfram eins og hingað til án beinna tilskipana, en þróunin aðeins studd á þann hátt, sem hér um ræðir og hv. þdm. er að sjálfsögðu kunnur.
N. leggur hér til nokkrar breyt., og vil ég aðeins gera grein fyrir þeim. Lagt er til, að 1. gr. orðist um. En meginbreyt., sem gerð er frá þeirri upphaflegu gr., er sú, að nánar er kveðið á um það, hverjir skuli kalla til starfa. N. leggur til, að þetta sé orðað á þessa leið: „Heimilt er skógræktarstjóra í samráði við hlutaðeigandi skólanefnd og skólastjóra að kveðja“ o.s.frv., í stað þess, að í frv. er aðeins sagt: „Heimilt er að kveðja hvern þann nemanda“ o.s.frv. N. taldi, að þetta væri gleggra þannig. — Þá er í lok gr. undirstrikað nokkru greinilegar en í upphaflega frv., að verkefni skógræktardagsins skuli velja að jafnaði innan skólahverfisins eða nálægt skólastað. Þó er þessu ekki slegið föstu. Frá því getur þurft að gera undantekningar, þótt það skuli vera meginreglan.
N. vill slá því föstu, að skógræktardagurinn skuli haldinn að vorinu, en hafa hitt laust, hvort hann fer fram áður en skóli hættir störfum, því að vel getur hagað svo til, að því verði ekki við komið, þó að það sé að sjálfsögðu æskilegast.
Þá er smáorðalagsbreyt., sem n. leggur til, að gerð verði á 3. gr., þannig að nánar er kveðið á um það, hverjir kalli menn til starfa. — Og í sambandi við 4. gr. er að síðustu smábrtt. um það, að reglugerð hér að lútandi skuli skógræktarstjóri semja í samráði við fræðslumálastjóra, og er því skotið inn í eftir ábendingu hans, eins og til þess að undirstrika aðild fræðslumálastjórnarinnar að þessu máli.
Landbn. væntir þess, sem sagt, að þetta mál nái fram að ganga.