16.01.1953
Efri deild: 50. fundur, 72. löggjafarþing.
Sjá dálk 1375 í B-deild Alþingistíðinda. (1991)
201. mál, erfðaleiga af hluta af prestssetursjörðum
Gísli Jónsson:
Herra forseti. Ég skal nú ekki ræða mikið um þetta frv. hér, sem fyrir liggur. En vegna þess að hæstv. landbrh. er við, þá vildi ég ræða hér um mál, sem er mjög þessu skylt og raunverulega snertir það nokkuð. Er það í sambandi við, hvernig farið hefur verið með kirkjujörðina Brjánslæk. Þar hefur nú einmitt verið skipt hálfri jörðinni, samkv. l. geri ég ráð fyrir, og það hefur orðið til þess, að það er útilokað um aldur og ævi að fá nokkurn prest á jörðina. Það hefur verið margreynt síðan þetta var gert, en það hefur verið gengið svo frá þeim málum, að það er enginn prestur, sem vili koma nálægt því að búa á jörðinni, eftir að búið er að gera þessi skipti. Og ef nú á að stíga lengra það spor, þannig að fáist nú prestur til þess að búa á jörð og vilji vera þar áfram og jörðinni á svo að skipta og hann vill ekki gefa eftir sinn rétt, þá megi taka það af honum leigunámi, þá finnst mér nú gengið heldur langt í þessu máli. Og ég vildi mjög mega vænta þess, að hæstv. ráðh. léti fara fram gagngerða endurskoðun á því, hvernig hefur verið farið með þetta höfuðból og hvort ekki sé hægt að kippa því aftur í lag. (Gripið fram í: Hvenær var það gert?) Það var gert fyrir 2–3 árum. Ég er ekki að segja, að það sé gert undir stjórn þessa hæstv. landbrh., en það hefur verið gert af þessum aðilum, sem fara með þessi mál, m.a. nýbýlastjórninni. Það þarf að koma í veg fyrir, að prestssetrið eða prestssóknin sé algerlega lögð niður, því að eins og þetta er nú, er ógerningur að búa við það. Ég vil segja hæstv. ráðh. það, að það er hvað eftir annað núna sótt á um, að viðkomandi bóndi fái svo að segja að gjöf einnig húsin. Hann er búinn að koma sér svo fyrir undir þessum samningum, að hann hefur þar tögl og hagldir. Og ef á að fara þannig með kirkjujarðir í framtíðinni, þá þarf sjálfsagt að athuga fullkomlega þessa löggjöf betur, en gert er hér með þessu frv.