02.12.1959
Sameinað þing: 5. fundur, 80. löggjafarþing.
Sjá dálk 3523 í B-deild Alþingistíðinda. (1701)
Fyrirspurnir um stjórnarráðstafanir ofl.
Karl Guðjónsson:
Herra forseti. Í tilefni af þeim ummælum, sem hér hafa komið fram í sambandi við væntanlega afgreiðslu fjárlaga, vildi ég mega spyrjast fyrir hjá fjmrh. svolítið frekar en orðið hefur varðandi áform hæstv. ríkisstj. um afgreiðslu þeirra laga.
Þar er þá fyrst til að taka, að við höfum fengið upplýsingar um það, að þetta plagg, sem lagt var hér á borðið hjá okkur fyrir nokkrum dögum, fjárlagafrv., sé ekki þess háttar skilríki, sem alvarlega sé takandi, heldur muni ríkisstj. og það sá sami hæstv. fjmrh., sem því lætur útbýta hér, hafa í hyggju að taka það aftur og láta okkur fá annað blað eftir áramótin, sem væntanlega eigi þá að verða það, sem fjárlagaafgreiðslan byggist á.
Nú vil ég vekja athygli á því, að í umr. hér undanfarna daga, — mig minnir, að það hafi verið s.l. laugardag síðast, sem einn hæstv. ráðh. úr ríkisstj., hæstv. dómsmrh., fann mjög að því, hvernig staðið hefði verið að afgreiðslu fjárlaga af hálfu fjvn. haustið 1957, og taldi, að þar hefði verið rasað um ráð fram í afgreiðslunni. Það var þó svo, að fjárlög voru afgr. í desembermánuði 1957, eftir að Alþingi hafði staðið í meira en tvo mánuði, og stöðugt höfðu verið haldnir fundir í fjvn. til undirbúnings fjárlagaafgreiðslu. Og ég vil hér með nota tækifærið til þess að mótmæla því sem ósönnu, sem sá hæstv. ráðh. hélt fram þar, að fundir hefðu fallið niður í fjvn. tímum saman vegna almenns aðgerðaleysis í þinginu á þeim tíma.
Það liggur sem sagt fyrir, að fjárlagafrv. á ekki að leggja fyrir samkvæmt áætlunum hæstv. ríkisstj., fyrr en einhvern tíma eftir 28. jan., eftir að þing hefur komið saman að nýju eftir þá þingfrestun, sem ríkisstj. fyrirhugar. Það þykir einnig vera of skammur tími til undirbúnings fjárlagaafgreiðslu, að fjárlög séu afgr., eftir að fjvn. hefur um þau fjallað í tvo mánuði. Ég vil vekja athygli á því, að þetta bendir til þess, að ríkisstj. hæstv. fyrirhugi það að láta fjárlagaafgreiðslu bíða a.m.k. þangað til í aprílmánuði eða þó líklega fremur þangað til í maí eða jafnvel enn þá síðar.
Af þessu tilefni vil ég alveg sérstaklega spyrja hæstv. fjmrh., hvort hann telur það ekki óeðlilegt, að fyrir fram — hálfu ári fyrir fram — séu gerðar áætlanir um það, að landið skuli fjárlagalaust í 4–5 mánuði, ef ekki lengur, þegar svo stendur á sem nú er, þannig að mörg mál eru enn í óvissu, og hvort hann teldi ekki hyggilegri vinnubrögð að byrja nú þegar á því að undirbúa ný fjárlög, jafnvel þótt ríkisstj. sé ekki að öllu tilbúin að kveða upp úr um það, hver skuli vera endanleg stefna hennar eða hverjar skuli verða endanlegar ákvarðanir hennar í þessu máli.