13.04.1962
Efri deild: 87. fundur, 82. löggjafarþing.
Sjá dálk 1870 í B-deild Alþingistíðinda. (1641)
44. mál, Handritastofnun Íslands
Sigurvin Einarsson:
Herra forseti. Ég þarf ekki að endurtaka þau rök, sem hv. síðasti ræðumaður flutti hér fyrir því, hvert sé í rauninni hið réttasta og sannasta nafn á þeirri stofnun, sem hér á að efna til. Rökin eru ótvíræð fram komin og birt í grg. með þessu frv. Félag íslenzkra fræða, heimspekideild háskólans og Sigurður Nordal prófessor hafa rökstutt þetta svo rækilega, að ég ætla mér ekki að bæta þar um.
Ég geri ráð fyrir Því, að mikill meiri hluti þjóðarinnar mundi vera sömu skoðunar og þessir vísindamenn og fræðimenn, sem leggja til, að stofnunin heiti Stofnun Jóns Sigurðssonar. Samt er það svo, að það virðist ekki vera hægt að fá þetta nafn á stofnunina hér á hv. Alþingi nú. Andstaða gegn þessu nafni er ótvíræð, a.m.k. er það svo hér í hv. Ed. Hv. frsm. menntmn. gat þess, að menn hefðu leitazt við að hafa samkomulag um afgreiðslu þessa máls, og taldi, að bezt færi á því, að hér yrði um samkomulag að ræða. Ég er honum fyllilega sammála um það. Það væri æskilegast, að svo gæti orðið. Og ég ætla mér ekki fyrr en í síðustu lög að rjúfa þá samstöðu. Þess vegna vil ég beina því til hv. n., hvort hún vilji ekki enn, fyrir 3. umr., athuga til úrslita, hvort ekki er hægt að ná samkomulagi um nafn Þessarar stofnunar. Ég hafði hugsað mér að flytja brtt. við þessa umr. um nafn hennar. Ég ætla að fresta því í þetta sinn og geyma Það til 3. umr., og ég ætla mér í millitíðinni að bera mig saman við mestu áhugamennina í Háskóla Íslands um þetta nafn. En fari svo, að við verðum sammála um, að flytja skuli brtt. um þetta, þá geri ég það við 3. umr. Þess vegna endurtek ég þá ósk mína, að hv. n. athugi þetta rækilega til 3. umr., því að eins og ég sagði, vil ég ekki trúa, að ekki náist samkomulag um afgreiðslu málsins, fyrr en í síðustu lög.
Ég hef orðið þess var, að menn kinoki sér við að eiga nú að fara að greiða atkvæði gegn till. um, að stofnunin heiti Stofnun Jóns Sigurðssonar, og ég skil það vel, að menn kunni að vera eitthvað feimnir við það, — en af hverju? Af því að þeir finna, að rökin eru mest og sterkust fyrir því, að stofnunin heiti þessu nafni, og þjóðin mun virða það, ef þetta nafn verður valið. Af því eru menn feimnir við þetta. En fyrst andstaðan er komin fram á annað borð í umr., andstaða gegn þessu nafni, þá eru menn ekkert of góðir til að sýna þá andstöðu í atkvgr. sjálfri.
Ég endurtek því það, sem ég sagði áðan. Ég mun bera mig saman við áhugamenn í háskólanum um það, hvort till. þessi skuli flutt við 3. umr., og ef við verðum sammála um, að það skuli gert, þá geri ég það.