21.03.1962
Sameinað þing: 44. fundur, 82. löggjafarþing.
Sjá dálk 728 í D-deild Alþingistíðinda. (3745)
176. mál, greiðslur vegna ríkisábyrgðar á árinu 1961
Fyrirspyrjandi (Þórarinn Þórarinsson):
Herra forseti. Ég þakka hæstv. fjmrh. fyrir þær upplýsingar, sem hann gaf hér um þessi mál, þó að þær væru að vísu hvergi nærri eins tæmandi og ég hafði farið fram á eða fsp. mínar fjallað um. Og satt að segja sé ég ekki þá meinbugi á því, sem hæstv. ráðh. færði fram, að það hefði þurft að taka óþarflega langan tíma að flytja slíka skýrslu, því að eins og sést í þeim ríkisreikningi, sem liggur hér fyrir hv. Alþingi fyrir 1960, þá eru ekki líkur til, að slík skýrsla þyrfti að taka svo langan tíma, þó að hún væri flutt hér. En það er hins vegar bót í máli, að hæstv. ráðh. hefur upplýst það, að þm. gætu átt fullan aðgang að þessari sundurlíðun.
Af því yfirliti, sem hæstv. ráðh. gaf hér, þá er náttúrlega ekki í fljótu bragði hægt að gera sér mynd af því, hvað muni einkum valda þeirri miklu aukningu á greiðslum vegna ríkisábyrgðalána, sem hefur átt sér stað tvö síðustu árin. En helzt virðist þó sú skýring vera á þessu, ef litið er á þessa tölu í fljótu bragði, að þessar greiðslur hafi aukizt vegna þess, að skuldir margra fyrirtækja hafa stóraukizt vegna fjármálaaðgerða hæstv. ríkisstj. og þá fyrst og fremst gengislækkananna og það eigi meginþáttinn í því, að þessar greiðslur hafa t.d. þrefaldazt síðan 1958. Í fljótu bragði virðist mér þetta vera meginástæðan til þess, hve þessar greiðslur hafa aukizt stórfelldlega, þó að vafalaust geti komið fleiri ástæður hér til greina, eins og það, að það hafi e.t.v. verið veitt nokkur stór ríkisábyrgðalán eftir 1958.